अब कर्णालीमा विकास तीव्र गतिमा बढ्छ : प्रधानमन्त्री ओली

सुर्खेत, वैशाख २ : प्रधानमन्त्री केपी शर्मा ओलीले विकासका दृष्टिले पछाडी परेको कर्णाली प्रदेशमा अब विकास निर्माणले रफ्तार लिने बताएका छन् । आइतबार मध्यपश्चिमाञ्चल विश्वविद्यालय सुर्खेतले वीरेन्द्रनगरमा आयोजना गरेको कार्यक्रममा बोल्दै प्रधानमन्त्री ओलीले विकासका दृष्टिले पछाडि परेको प्रदेशलाई विकासको मूल प्रवाहमा ल्याउनका लागि आफूले पहिलो प्रदेश भ्रमण कर्णालीबाट गरेको बताए ।

उनले कर्णालीलाई समृद्धिको यात्रामा डोर्याउन संघीय सरकार र प्रदेश सरकारले योजना बनाइरहेको बताए । ‘अव कर्णाली प्रदेशलाई पछाडि पर्न दिइन्न’ प्रधानमन्त्री ओलीले भने, ‘कर्णालीलाई विकासको मूलधारमा ल्याउनका लागि प्रदेश र संघीय सरकारले योजनाहरु बनाइरहेको छ ।’

उनले कर्णाली प्रदेश दक्षिणको छिमेकी भारतसँग सीमा नजोडिएकाले उत्तरको छिमेकी चीनसँग विभिन्न ठाउँमा सीमा जोड्नुपर्ने आवश्यकता रहेको बताए। प्रधानमन्त्री ओलीले कर्णाली प्रदेश आर्थिक र मानव विकास सूचकाङ्कमा पछाडि रहेको भन्दै विकास र समृद्धिको यात्रा पनि कर्णालीबाटै सुरु भएको घोषणा गरे ।

राजनीतिक अधिकार प्राप्तीको आन्दोलन टुङ्गो लागिसकेकाले अबको समय विकास र समृद्धिको भएको बताएका छन्। प्रधानमन्त्री ओलीले तीन वटै तहमा सरकार गठन भइसकेकाले जनताको चाहना अनुसार विकास र समृद्धिको यात्रामा लाग्नुपर्ने बताए। ‘तीन वटै तहका सरकार बनेका छन्, जनताको बलिदानिबाट लोकतन्त्र प्राप्त भएको छ’ प्रधानमन्त्रीले भने ‘अब अरुलाई अपजस दिएर हुँदैन् विकास गर्नैपर्छ, अगाडि बढ्नैपर्छ।’