जेठ १६ काठमाडौँ, । आगामी आर्थिक वर्ष २०८२/८३ को बजेटप्रति निजी क्षेत्रबाट सकारात्मक प्रतिक्रिया आएको छ । उपप्रधानमन्त्री तथा अर्थमन्त्री विष्णु पौडेलले बिहीबार सङ्घीय संसद्मा प्रस्तुत गर्नुभएको बजेटले कृषि, पर्यटन, उद्योग जस्ता परम्परागत विषयदेखि जस्तै सूचना प्रविधि, वैकल्पिक ऊर्जा तथा वित्तसम्मका तुलानात्मक लाभका नयाँ विषय समेटेको बताइएको छ ।
नेपाल उद्योग वाणिज्य महासङ्घका अध्यक्ष चन्द्र ढकालले बजेटले निजी क्षेत्रले अगाडि सारेका केही माग सम्बोधन भएका भन्दै अहिलेको समस्यालाई सम्बोधन गर्ने प्रयास गरेको उल्लेख गर्नुभयो । उहाँका अनुसार केही संरचनागत सुधार र लगानीका लागि निजी क्षेत्रलाई प्रोत्साहित गर्न सक्ने आधार तयार पारी कार्यान्वयन गर्नुपर्ने चुनौती भने रहेको छ । विशेष आर्थिक क्षेत्रमा दिइएको सहुलियत र औद्योगिक क्षेत्रबाट ३० प्रतिशत निर्यात गर्दा पनि सुविधा दिने विषयले उत्पादनमूलक क्षेत्रमा सकारात्मक प्रभाव पर्ने उहाँको विचार छ ।
निजी क्षेत्रको संलग्नतामा इन्कुवेसन केन्द्र स्थापना गर्ने एवं महिला उद्यमीलाई व्यवसाय दर्ता गर्दा छुट दिने व्यवस्थाले महिला एवं युवालाई आकर्षित गर्ने, सूचना प्रविधिसम्बन्धी उद्योगको प्रवर्धनका लागि डाटा सेन्टरसम्बन्धी उद्योगलाई निरन्तर र सहुलियत दरमा विद्युत् आपूर्तिको व्यवस्थाले प्रोत्साहित गर्ने छ ।
एकै ठाउँमा दर्ता गर्दा पुग्ने व्यवस्था कार्यान्वयन कुन र कसरी हुन्छ, त्यो हेर्न बाँकी नै भए पनि यसले सहज बनाउने उहाँको भनाइ छ ।
नेपाल घरेलु तथा साना उद्योग महासङ्घका अध्यक्ष उमेशप्रसाद सिंहले मध्यम किसिमको बजेट भन्दै आर्थिक अभावका कारण लघु, घरेलु तथा साना उद्योगलाई समेट्न नसकेको टिप्पणी गर्नुभयो । देशको अर्थतन्त्रको मेरुदण्डका रूपमा रहेका तर समस्या भेलिरहेका यस्ता उद्योगको प्रवर्धनका लागि आवश्यक सुझाव केही मात्रै समेटिएको उहाँको धारणा छ ।
बजेट जस्तो भए पनि कार्यान्वयनमा समस्या हुने उहाँको धारणा छ । बजेटले लघु, घरेलु तथा साना उद्योग र महिलाका लागि विशेष सम्बोधन गरेको उहाँको भनाइ छ ।
नेपाल चेम्बर अफ कमर्सका अध्यक्ष कमलेशकुमार अग्रवालले बजेट निजी क्षेत्रमैत्री नै आएको भन्दै इभीमा कर नबढाउन आफूहरूले दिएको सुझाव कार्यान्वयन भएको बताउनुभयो । त्यसै गरी व्यवसाय गर्दा जग्गाको हदबन्दीमा पनि बजेटले बोलेको, कर्जा विस्तारको विषयमा पुनर्तालिकीकरण गर्न दिने भनिएको भए पनि कार्यान्वयन पक्ष भने कस्तो हुन्छ त्यसमा नै निर्भर हुने उल्लेख गर्नुभयो ।
उहाँले बजेटलाई महत्वाकाङ्क्षी नै भन्दै आर्थिक शिथिलता भइरहेका बेलामा कार्यक्रम धेरै नै राम्रो देखाइएको भए पनि कार्यान्वयन चुनौतीपूर्ण रहेको दाबी गर्नुभयो । बजेटको कार्यान्वयन गर्न मौद्रिक नीति पनि त्यही अनुसार नै आउनुपर्ने उहाँको धारणा छ ।
उपाध्यक्ष नेपाल उद्योग परिसङ्घका उपाध्यक्ष रोहित गुप्ताले स्टार्टअप उद्यमीलाई प्रोत्साहन गर्ने बजेट आएको र निजी क्षेत्रका लागि गरेको सम्बोधन राम्रो रहेको उल्लेख गर्नुभयो । यसले उद्योगीको मनोबल बढाउने र स्टार्टअपलाई प्रोत्साहन गर्ने भएको तथा धेरै वटा कार्यक्रम निजी क्षेत्रसँग मिलेर गर्ने भनेको कुराले राम्रो सन्देश दिन खोजेको जनाउनुभयो ।
नेपाल अटोमोबाइल्स एसोसिएसन (नाडा) का अध्यक्ष करण चौधरीले बजेटले नाडालाई अर्थपूर्ण रूपमा सम्बोधन गरेको तथा उद्योगी व्यवसायी र युवालाई प्रोत्साहन गरेको उल्लेख गर्नुभयो । विद्युतीय सवारीसाधनमा जोडिएका समग्र व्यवसायीलाई प्रोत्साहन गरेको, भृकुटीमण्डपलाई अन्तर्राष्ट्रियस्तरको प्रदर्शनी केन्द्र बनाउने विषय बजेटका स्वागतयोग्य विषय रहेको उहाँले बताउनुभयो ।
