दसैंमा तरकारीको मूल्य आकाशियो, उपभोक्ता मारमा

काठमाडौं, १९ असोज । दसैंमा तरकारीको मूल्य ह्वात्तै बढेको उपभोक्ताहरुले गुनासो गरेका छन । विशेष गरी दसैंमा सवारी साधान नचलेपछि तरकारीको आपूर्तिमा कमी आएसँगै तरकारीको मूल्य आकाशिएको हो ।

अष्टमीको दिन काठमाडौंको कालिमाटी फलफूल तथा तरकारी बजारमा पुगेका उपभोक्ताहरुले तरकारीको मूल्य ह्वात्तै बढेको प्रतिक्रिया दिएका हुन् । दसैंमा आवागमन ठप्प भएपछि व्यापारीहरुले काठमाडौंमा तरकारीको मूल्य ह्वात्तै बढाएको पाइएको छ । दसैंमा आवागमनको काम ठप्प भएपछि तरकारीको मूल्य ह्वात्तै बढन गएको उपभोक्ताको भनाइ छ ।

कालीमाटी तरकारी होलसेल बजारमा लसुनको प्रतिकेजी १२० रुपैयाँ मूल्य रहेको छ । बाहिर अन्य पसलहरुमा लसुनको मूल्य व्यापारीहरुले प्रतिकेजी १६० सम्म पुर्‍याएका छन् । त्यसैगरी अदुवाको मूल्य प्रतिकेजी २४० रुपैयाँ पुगेको छ ।

कालीमाटी होलसेल बजारमा खुर्सानी प्रतिकेजी ३८० रुपैयाँमा बिक्री गरिएको छ भने यसलाई बजारमा ४०० रुपैयाँसम्ममा बिक्री गरिएको छ ।

सरकारले बजार अनुगमनको काममा उपस्थिति देखाउन नसक्दा पनि तरकारी, फलफूलसहित दसैंका लागि उपभोक्तालाई अतिआवश्यक पर्ने वस्तुको मूल्य ह्वात्तै बढाइएको हो । वस्तुको मूल्य ह्वात्तै बढ्दा यस वर्षको दसैंमा निकै मारमा परेको आम उपभोक्ताको गुनासो छ ।