भिडियो कन्फरेन्स गलत भन्दै राधेश्यामले दिए तीन कारण

काठमाडौं । राष्ट्रिय सभा सदस्य राधेश्याम अधिकारीले प्रधानमन्त्री केपी ओलीले सिंगापुरबाटै भिडियो कन्फरेन्समार्फत् मन्त्रीपरिषद् बैठक गर्नु गलत भएको टिप्पणी गरेका छन् । राष्ट्रियसभामा बुधबार उनले भिडियो कन्फरेन्स के कारणले गलत हो भन्दै तीन कारण प्रस्तुत गरेका छन् । 

प्रधानमन्त्री  ओलीको स्वास्थ्यलाभको कामना गर्दै सांसद अधिकारीले भिडियो कन्फरेन्स तीन कारणले आपत्तिजनक रहेको बताए । प्रधानमन्त्री केपी ओलीले केही दिनअघि सिंगापुरबाटै भिडियो कन्फरेन्समार्फत् मन्त्रिपरिषद् बैठक राखेका थिए । सोबारे प्रमुख प्रतिपक्षी दल नेपाली कांग्रेसले विरोध गरेको थियो । 

राधेश्यामले दिएका यी हुन् तीन कारण  
हालसालै भिडियो कन्फरेन्समार्फत् मन्त्रीपरिषद्को बैठक बसेको छ । भिडियो कन्फरेन्समार्फत् बैठक सञ्चालन गर्नु तीन कारणले आपत्तिजनक छ । 

पहिलो, प्रधानमन्त्रीज्यू उपचारको लागि जानुअघि उपप्रधानमन्त्रीलाई कार्यवाहक दिएर जानु भएको हो । कार्यवाहक दिएर गएको सूचना यसै सदनमा राष्ट्रपतिको सन्देशमार्फत् हाम्रो जानकारीमा पनि आएको हो । कार्यवाहक प्रधानमन्त्री छँदाछँदै आफूले मन्त्रिपरिषद्को बैठक सञ्चालन गरिसकेपछि कार्यवाहक प्रधानमन्त्री कार्यवाहक रहनुहुन्न । आज यो मुलुकमा कार्यवाहक प्रधानमन्त्री हुनुहुन्छ की हुनुहुन्न ? भन्ने कुरामा अभर पर्ने भयो । 

दोस्रो, औपचारिक रुपमा विदेशमा बसेर मन्त्रिपरिषद्को बैठक बस्न सक्छ कि सक्दैन ? 

तेस्रो, र सबैभन्दा महत्वको विषय भनेको मन्त्रिपरिषद्को गोपनीयता सम्बन्धि सवाल हो । इन्टरनेटको माध्यमबाट गरिने यस्तो कार्यमा गोपनीयता धरापमा पर्दछ भन्ने कुरा जान्न आइटीकै विद्यार्थी भइरहनुपर्दैन । यसमा कानुनको ठूलो त्रुटी भएको छ । आउँदा दिनमा सरकारबाट यसपटक भएको गल्ती नदोहोरिने प्रतिवद्धता आओस् भन्ने हामी चाहन्छौं ।