अनुशासन समितिमा सभापति देउवा र शेखर कोइरालाविरुद्ध उजुरी

साउन १७, काठमाडौं : नेपाली कांग्रेसको अनुशासन समितिमा पार्टी सभापति शेरबहादुर देउवा र केन्द्रीय सदस्य डा. शेखर कोइरालाविरुद्ध उजुरी परेको छ ।

भरतपुरमा रुख चिहृनबाहेक अन्यत्र मतदान गर्न लगाएको भन्दै सभापति देउवाविरुद्ध उजुरी परेको हो भने नेता कोइरालाको १२ औं महाधिवेशनमा केन्द्रीय सदस्य बन्दा योग्यता नपुगेको आरोप छ ।

देउवाले स्थानीय चुनावमा भरतपुर महानगरको मेयरमा तत्कालीन माओवादीकी उम्मेदवार रेनु दाहाललाई भोट मागेका थिए । यसैविरुद्ध उनीमाथि उजुरी परेको हो ।

चुनावी तालमेल, राजनीतिक निर्णय भएको भन्दै देउवाको उजुरी पेन्डिङमा राखिएको छ ।

यस्तै शेखर कोइराला कांग्रेसको विधानअनुसार नचलेको उजुरीकर्ताको दाबी छ ।

कांग्रेसको विधानअनुसार लगातार १० वर्ष क्रियाशील सदस्य भएपछि मात्र केन्द्रीय सदस्य हुन पाइन्छ । तर वि.सं. २०६० सालसम्म वीपी कोइराला स्वास्थ्य विज्ञान प्रतिष्ठान, धरानका उपकुलपति रहेका कोइराला लगातार १० वर्ष क्रियाशील सदस्य नभइ पार्टी केन्द्रीय सदस्य भएको उजुरीकर्ताको दाबी छ ।