प्रदेश २ मा कांग्रेसलाई प्रमुख प्रतिपक्षीको मान्यता

प्रदेश सभामुख सरोजकुमार यादवले कांग्रेसलाई प्रमुख प्रतिपक्षी दलको मान्यता दिएका छन् । अब कांग्रेस संसदीय दलका नेता रामसरोज यादव प्रदेश २ का प्रमुख प्रतिपक्षी दलको नेता भएका छन् ।

प्रदेश सभामुख यादवले प्रदेश सभा नियमावली नबनेसम्म कांग्रेसलाई प्रतिपक्षी दलको मान्यता दिएको बताए । ०७३ मा बनेको संघीय सदनको कानुनअनुसार नै कांग्रेसलाई विपक्षी दलको मान्यता दिएको उनले बताए । यादवले भने, ‘प्रदेश सभा नियमावली बनेपछि सोहीअनुसार प्रमुख प्रतिपक्षीको व्यवस्था हुनेछ, तत्काललाई संघीय सदन नियमावलीअनुसार निर्णय लिएको हुँ ।’

प्रदेश सभामा तत्कालीन एमाले र कांग्रेस दुवैले प्रमुख प्रतिपक्षी दलको दाबी गरेपछि विवाद भएको थियो । तत्कालीन एमालेले सरकारलाई विश्वासको मत दिएकाले आफूहरूले प्रमुख प्रतिपक्षी दलको मान्यता पाउनुपर्ने कांग्रेसको माग थियो । एमाले सत्ता पक्ष भएको कांग्रेसको जिकिरलाई तत्कालीन एमाले नेताहरूले अस्वीकार गर्दै आएका थिए । कांग्रेसले भने प्रमुख प्रतिपक्षीको मान्यता दिन माग गर्दै संसद् अवरुद्ध गर्दै आएको थियो ।

कांग्रेस संसदीय दलका नेता रामसरोज यादवले प्रदेश सभामुखको निर्णयको स्वागत गरे । ‘यो पहिला नै लिनुपर्ने निर्णय थियो, ढिलो भए पनि ठीक भएको छ, सभामुखलाई धन्यवाद दिन्छौँ ।’ प्रमुख प्रतिपक्षी दल कुनै पनि सभाको गहना भएको उनले बताए । अब कांग्रेसले सरकारको काममा रचनात्मक सहयोग गर्ने उनको भनाइ छ ।