पोलियोविरुद्धको नयाँ खोप ल्याइँदै

बालबालिकालाई पोलियोविरुद्ध दिइने खोप एफआईपीभी आगामी असारबाट प्रयोगमा ल्याउने तयारी भएको छ । ‘आईपिभी खोपको ठाउँमा एफआइपिभी खोप पर्याप्त उत्पादन हुने भएकाले स्वास्थ्य मन्त्रालयको खोप महाशाखाले यो नयाँ खोप ल्याउने तयारी गरेको हो । 

चैतमा नेपाल भित्रने यो खोप आगामी असारदेखि प्रयोगमा ल्याइने तयारी भएको महाशाखाले जनाएको छ । एफआईपीभी खोप सञ्चालनमा ल्याउन स्वास्थ्यकर्मीलाई तालिम दिनुपर्ने भएकाले असारबाट मात्र प्रयोगमा ल्याउन लागिएको हो । हाल शिशुलाई तीन पटक दिइँदै आएको खोप एफआईपीभी प्रयोगमा आएपछि दुई मात्रा दिए पुग्ने महाशाखाले जनाएको छ । हाल बालबालिकामा दिइने खोप आईपिभी पोलियो खोप हो । 

आईपीभी खोपको अभाव देखिएपछि सरकारले एफआइपिभी नामक नयाँ खोप ल्याउने तयारी गरेको महाशाखाका निर्देशक कृष्णबहादुर चन्दले बताए । निर्देशक चन्दले भने, “सरकारले मंसिरबाट सञ्चालनमा ल्याउने तयारी गरेको एफआईपिभी खोप विभिन्न प्रक्रियाका कारण आउन ढिलो भएको छ ।” यो खोप पनि ‘गाभी’ नामक अन्तर्राष्ट्रिय संस्थाको सहयोगमा ल्याउन लागेको उनले जानकारी दिए ।

सरकारले मुलुकबाट पोलियो उन्मूलन गर्न विगत एक वर्षदेखि पोलियो थोपासँगै सुईबाट दिइने आइपिभी खोप पनि सुरु गरेको थियो । तर, एक वर्ष नपुग्दै आइपिभी पोलियो खोपको अभाव भएपछि सरकारले नयाँ एफआइपिभी खोप ल्याउन तयारी गरेकोे हो ।