अर्थ राज्यमन्त्री उदय शम्शेर राणा : चुनाव हार्ने डरले वाम एकता

काठमाडौं । अर्थ राज्यमन्त्री उदय शम्शेर राणाले सत्ता स्वार्थका लागि तीन वाम घटकबीच  चुनावी तालमेल भएको बताएका छन् । काठमाडौंमा बुधबार पत्रकारहरुसँग कुरा गर्दै राणाले चुनावमा एक्ला–एक्लै जाँदा पराजित हुने डरले तीन दलहरुबीच तालमेल भएको बताए । ‘‘नाममा वाम एकता भने पनि सत्ता स्वार्थका लागि उनीहरु एक ठाउँमा उभिन बाध्य भएका हुन्,’’ अर्थ राज्यमन्त्री राणाले भने, ‘‘चुनावमा हारिन्छ कि भन्ने डरले एक भएका हुन् ।’’

मंगबालर नेकपा एमाले, नेकपा माओवादी केन्द्र र नयाँ शक्तिबीच चुनावी तालमेल गर्ने र चुनाव लगत्तै पार्टी एकता गर्ने औपचारिक घोषणा भएको थियो । राणाले तीन दलबीचको तालमेल लोकतन्त्रका लागि खतरा भएको समेत बताए । लोकतान्त्रिक व्यवस्थालाई कमजोर बनाउन बाम शक्तिहरु एक भएको उनको दावी थियो ।

अर्थ राज्यमन्त्री राणाले कांग्रेसले लोकतान्त्रिक शक्तिहरुलाई एकतावद्ध गर्ने बताए । उनले भने, ‘‘हामी लोकतान्त्रिक शक्तिहरुलाई एक ठाउँमा राखेर बृहत लोकतान्त्रिक गठबन्धन बनाउँछौ ।’’