एकताको मुख्य लक्ष्य मुलुकको समृद्धि हो, सत्ता होइन : ओली

काठमाडौं, १७ असोज । नेकपा एमालेका अध्यक्ष केपी शर्मा ओलीले एमाले, माओवादी र नयाँ शक्तिको चुनावी तालमेल सत्ताको लागि नभएर मुलुकको समृद्धिको लागि भएको बताएका छन् ।

मंगलबार काठमाडौंमा आयोजित नेकपा एमाले, नेकपा माओवादी केन्द्र र नयाँ शक्ति नेपालबीच संयुक्त एकता संयोजन समिति घोषणा कार्यक्रममा बोल्दै अध्यक्ष ओलीले भने, ‘हाम्रो मुख्य लक्ष्य मुलुकको समृद्धि हो सत्ता होइन, नेपालको जन्मुकुण्डलीमा २०७४ सालमा वामपन्थी र देशभक्तहरुको सरकार बन्ने त लेखेकै छ ।’

उनले कांग्रेसलाई व्यंग्य गर्दै भने,  ‘यसलाई कसैले मेट्न सक्दैन । बरु हाम्रो सहमतिले कतिपयलाई निद्रा नलाग्न सक्छ, स्लिपिङ ट्याबलेटको बिक्री बढी हुन सक्छ ।’

आगामी मंसिरमा हुने प्रतिनिधि सभा र प्रदेश सभाको निर्वाचनमा तालमेल र निर्वाचनपछि पार्टी एकीकरण गर्नेलगायत छबुँदे सहमतिपत्रमा हस्ताक्षर गरेपछि मन्तव्य राखेका उनले यो अभियानमा अन्य साना वाम दल र प्रगतिशील शक्तिलाई पनि सामेल गराउने घोषणा गराउने बताए ।

ओलीले यस सहमतिको उत्साह र बिना संकुचन कार्यान्वयनमा जुट्न सम्बद्ध सबै दलका कार्यकर्तामा आह्वान गरे । एमालेको मूल चरित्र नै एकता र एकीकरण भएकाले यसमा आफूहरु अभ्यस्त भएको उनको भनाइ थियो ।

उनले आफूहरु सबै छिमेकीसँग बराबरी राष्ट्रको हैसियतका आधारमा मैत्रीपूर्ण सम्बन्ध कायम गर्न सदैव प्रतिबद्ध रहेको उल्लेख गरे ।a