आयोगको चेतावनी : आचार संहिता उलंघन गरे उम्मेदवारी खारेज हुन्छ

२० भदौ, काठमाडौं – निर्वाचन आयोगले दुई नम्बर प्रदेशको स्थानीय तह निर्वाचनका लागि भोली हुने उम्मेदवारी मनोनयनमा उत्साहपूर्वक सहभागी हुन दलहरुलाई आह्वान गरेको छ ।

आयोगले आज पत्रकार सम्मेलन गर्दे प्रदेश नम्बर दुईको निर्वाचनका लागि सम्पूर्ण तयारी पूरा भएको भन्दै दलहरुलाई उम्मेद्वारी मनोनयनमा सहभागी हुन आह्वान गरेको हो ।

प्रमुख आयुक्त डा. अयोधिप्रसाद यादवले प्रदेश नम्बर दुईका ८ जिल्लाका १३६ स्थानीय तहमा हुने निर्वाचनमा भाग लिन उत्साहपूर्वक उम्मेद्वारी दर्ता गराउन दलहरु र उम्मेद्वारहलाई आग्रह गरे ।

प्रमुख आयुक्त यादवले प्रदेश नम्बर २ मा सबै दल निर्वाचनमा सहभागी हुन लागेकाले आयोग हर्षित भएको बताए । यस्तै प्रमुख आयुक्त यादवले आचारसंहिताको पालना गर्न उम्मेदवारलाई आग्रह गर्दै आचारसंहिता उलंघन गरे उम्मेदवारी नैं खारेज हुने चेतावनी दिनुभयो ।

प्रदेश नम्बर दुईका १ सय ३६ स्थानीय तहमध्ये एक महानगरपालिका, ३ उपमहानगरपालिका, ७३ नगरपालिका र ५९ गाउँपालिका छन् । प्रदेश नम्बर–२ को स्थानीय तह निर्वाचनवाट ६ हजार ६ सय २७ जना जनप्रतिनिधि चयन हुनेछन् ।

आयोगले निर्वाचनका लागि सुरक्षाकर्मीबाहेक ३१ हजार ५ सय कर्मचारी परिचालन गरेको जनाएको छ ।