पशुपति शमशेर अदालतमा, कमल थापा भन्छन् : गाईजात्रा !

काठमाडौं २ भदौ – पूर्वपञ्चहरुको पार्टी राप्रपा विभाजनको विबाद सर्वोच्च अदालतसम्म पुगेको छ । पार्टीको आधिकारिकता दिलाउन मागगर्दै पशुपति शम्शेर राणा सर्वोच्च अदालत पुगेका छन् ।

निर्वाचन आयोगमा यसअघि बुझाएको ४० प्रतिशत केन्द्रीय सदस्यको नामावली कै आधारमा छुट्टै दल दर्ताको आदेशको माग गर्दै राणा समूह शुक्रवार सर्वोच्च गएको हो । 

राप्रपा प्रजातान्त्रिक गठनको मागगर्दै राणा समूहले साउन २२ गते निर्वाचन आयोगमा निवेदन दिएको थियो । दल विभाजनका लागि दिएको निवेदनमा मागदाबी नपुगेपछि आयोगले केन्द्रीय सदस्यको हस्ताक्षर माग गरेको थियो । हस्ताक्षर सनाखत गर्न आयोगले भदौ ४ गतेसम्मको समय दिएको छ । हस्ताक्षरको सनाखत बुझाउने म्याद सकिनु दुइदिन अघि राणा समूह अदालत गएको हो ।

रिटमा कमल थापाले आफ्ना पक्षका केन्द्रीय सदस्यलाई अपहरण शैलीमा बन्दी बनाएको दावी गरिएको छ । राणा समूहमा हस्ताक्षर गरेका एक केन्द्रीय सदस्य आङ ङिमा शेर्पा थापा समूहमै फर्किएका थिए । राणा समूहको दावीलाई थापाले भने गाइजात्राको संज्ञा दिएका छन् । ‘पशुपतीजी पनि हसाउनु हुन्छ, गाईजात्रा सकिएको त निकै भैसक्यो !’ थापाले शुक्रवार सामाजिक सञ्जाल ट्वीटरमा सन्देश लेखेका छन् ।