अाजका पत्रपत्रिकाका फ्रन्टपेजः

१४ साउन, काठमाडौं । प्रदेश सभा र प्रतिनिधिसभा निर्वाचनका लागि सुरु गरिएको फोटोसहितको मतदाता नामावली संकलनमा मतदाताको उत्साहजनक उपस्थिति देखिएको छ । धेरै मतदाता भएका र शहरी क्षेत्रमा नयाँ मतदाताले नाम दर्ता गराएको आजका पत्रपत्रिकाहरुले लेखेका छन् ।

स्थानीय तहमा जनप्रतिनिधि निर्वाचित भएपछि उनीहरुले मनपरी निर्णय गर्न थालेको विषयलाई पनि आजका पत्रपत्रिकाहरुले उठाएका छन् । प्रहरीको आईजीपीले विवादास्पत निर्णय गर्न थालेको, दाताको सहयोगमा निर्वाचन आयोग चलेकोलगायत खबर आजका पत्रपत्रिकाको प्राथमिकतामा परेका छन् । भ्रष्टाचार सावित भएपछि पाकिस्तानी प्रधानमन्त्रीद्वारा राजीनामा दिएको विषयलाई पनि पत्रपत्रिकाहरुले प्राथमिकताका साथ उठाएका छन् ।

गोरखापत्र दैनिकले मतदाता नामावली संकलन देशभर उत्साहजनक रहेको आज लेखेको छ । दल दर्ताका लागि निर्वाचन आयोगले आह्वान गरेकोदेखि प्रत्यक्ष चुनावमा पनि आरक्षणको माग गरिएकोसम्मका खबरलाई गोरखापत्रले आज प्राथमिकताका साथ लेखेको छ ।

वैदेशिक रोजगारीका लागि विभिन्न देशमा जाने नेपालीहरुको पीडालाई नागरिकले आज लेखेको छ भने कान्तिपुर दैनिकले स्थानीय तहमा जथाभावी निर्णय भएको विषयबारे एक सामग्री छापेको छ ।

अन्नपूर्ण पोस्ट दैनिकले आईजीपी प्रकाश अर्याल विवादमा पर्दै गएको लेखेको छ । ‘दाताको सहयोगमा चल्दै निर्वाचन आयोग’ शीर्षक दिएर मुख्य खबर लेखेको नयाँ पत्रिका दैनिकले शेरबहादुर देउवा नेतृत्वको सरकारले सदाचारलाई कुल्चेकोलगायत खबरलाई पहिलो पृष्ठमा प्राथमिकताका साथ छापेको छ ।