चीनमा ‘दंगल’ले रच्यो नयाँ इतिहास

१७ जेठ, एजेन्सी । अभिनेता आमिर खान अभिनित फिल्म ‘दंगल’ले चीनमा नयाँ इतिहास बनाएको छ । फिल्मले एक अरब युआन अर्थात् एक हजार करोड भारु कमाई गरेको छ ।

चीनको धेरै फिल्म हलसँग जोडिएको एक चर्चित टिकट वेबसाइट ‘माओयान जो’का अनुसार, ‘दंगल’को कमाई एक अरब युआनभन्दा बढी भएको छ । यसका साथै चीनको फिल्म उद्योगको इतिहासमा ३२ फिल्मको विशेष क्लबमा सहभागी भएको छ । कुनै पनि भारतीय फिल्मका लागि यो सफलता अभूतपूर्व रहेको फिल्म चीनमा भारतीय फिल्म वितरकले बताएका छन् ।

चीनमा अहिले फिल्म ‘पायरेट्स अफ क्यारिबियन पांच’ले पहिलो स्थान लिएको छ, त्यस्तै ‘दंगल’ले दोस्रो स्थान ओगटेको छ । दंगल अहिले चीनका ९ सय स्क्रिनमा चलिरहेको छ । चीनको बक्स अफिसमा यस सफलताको अर्थ विश्वमै सबैभन्दा बढी कमाई हुन्छ ।

यति मात्रै होइन, चीनमा आमिर खान ६.५५ लाख फलोअर्सको साथमा सामाजिक सञ्जालमा स्टार बनेका छन् । चीनमा भारतीय प्रधानमन्त्री नरेन्द्र मोदीभन्दा चर्चित आमिर खान बनेको पनि खबर आइसकेको छ ।