प्रचण्डले प्रधानमन्त्रीबाट राजीनामा दिने मिति तोकियो

काठमाडौं, वैशाख १५ – प्रधानमन्त्री पुष्पकमल दाहाल प्रचण्डले जेठको पहिलो हप्ता सरकार छाड्ने र नेपाली कांग्रेसलाई हस्तान्त्रण गर्ने तयारी भएको छ । बैशाख ३१ मा चुनाव भए जेठको २ गते प्रधानमन्त्री पदबाट राजीनामा दिने प्रधानमन्त्री निकट उच्च स्रोतले जनाएको छ । राजीनामा दिएको एकहप्तामा देउवालाई प्रधानमन्त्रीको कुर्सी जिम्मा लगाउने गरि आन्तरिक तयारी भइरहेको छ । तर, केहीगरि चुनाव सर्ने अवस्थामा भएमा सहमति पनि पछि धकेलिनेछ ।

बैशाख ३१ गते स्थानीय तहको चुनाव भए लगत्तै पूर्वसहमति अनुसार सत्ता कांग्रेस सभापति शेरबहादुर देउवालाई हस्तान्त्रण गर्ने प्रधानमन्त्रीले नै यसअघि बताइसकेका छन् । ‘जेठ पहिलो हप्तानै कांग्रेस सभापति देउवा प्रधानमन्त्री हुनेगरि सत्ता छाड्ने तयारी छ’ स्रोतले भन्यो, ‘जेठको २ गते राजिनामा दिने विषयमा मोटामोटी सहमति भएको छ त्यो कायम रहेमा जेठ २ गते देशबासीका नाममा सम्वोधन गर्दै प्रधानमन्त्रीको राजिनामा आउनेछ । ’

कांग्रेस र माओवादी केन्द्रबीच दाहाल प्रधानमन्त्री हुदा चैत मसान्तसम्म स्थानीय तहको चुनाव सम्पन्न गरी प्रधानमन्त्रीमा देउवालाई स्थानान्त्रण गर्ने लिखित सहमति भएको थियो । प्रधानमन्त्रीले राजिमा दिने र कांग्रेसका सभापति प्रधानमन्त्री बन्ने भएपछि त्यसको भित्री कसरत पनि सुरु भएको छ । सरकारमा सहभागि गराउने भन्दै साना दलहरुलायृ आकर्षित गर्न छलफल भइरहेका छन् ।