विश्वकप छनोटको पहिलो खेलमै नेपाललाई सफलता,सिंगापुर पराजित

सिंगापुरमा जारी आइसीसी यु–१९ विश्वकप क्रिकेटको एसियन छनोटको पहिलो खेलमा नेपालले घरेलु टोली सिंगापुरलाई ४ विकेटले पराजित गरेको छ । सन् २०१८ मा न्यूजिल्याण्डमा हुने आइसीसी यु–१९ विश्वकप क्रिकेटको छनौटको पहिलो खेलमा घरेलु टोली सिंगापुरले दिएको ७४ रनको लक्ष्य नेपालले १७ दशमलब ३ ओभरमा ६ विकेटको क्षतिमा भेट्टाएको हो ।नेपालका लागि प्रनित थापा मगरले सर्वाधिक २३ रनको योगदान दिए। यस्तै, अनिल शाहले १९ रन जोड्दा रोहित कुमार पौडेलले ११ र पवन सराफ ४ रनमा अविजित रहे । सुरुवाती व्याट्सम्यान सन्दिप सुनार १ रन र आरिफ सेख ४ रनमा पेभिलियन फर्केका थिए ।

यसअघि टस हारेर पहिले ब्याटिङको निम्तो पाएको घरेलु टोली सिंगापुरले २९ ओभरमा अलआउट हुँदै ७३ रनको योगफल तयार पारेको थियो । नेपाली बलरसामु निरीह साबित भएको घरेलु टोली सिंगापुरका लागि ब्रिगु लायरले सर्वाधिक ४२ बनाएका थिए । यस्तै, सेन अग्रवालले ११ रन बनाउँदा अन्य व्याट्सम्यानले दोहोरो अंक नै जोड्न सकेनन् ।

सिंगापुरका कप्तान जनक प्रकाश, आर्यमान सुनिल र रोहन रंंगराजनले खाता नै खोल्न सकेनन् । सिंगापुरलाई सस्तैमा समेट्न नेपालका लागि कप्तान सन्दिप लामिछानेले सर्वाधिक ५ विकेट लिए भने साहब आलमले ३ तथा किशोर महतोले २ विकेट लिएका थिए ।एसियन छनौटमा शीर्ष चार राष्ट्र नेपाल, सिंगापुर, अफगानिस्तान र मलेसियाबीच प्रतिस्पर्धा हुनेछ । यी चार टोली मध्ये शीर्ष स्थानमा रहन सफल टोली सन् २०१८ मा न्यूजिल्याण्डमा हुने यु–१९ विश्वकप क्रिकेटका लागि छनोट हुनेछ ।