आरआरमा आज स्ववियु चुनाव, अदालतको दुरुपयोग: क्रान्तिकारी

काठमाडौं : थुप्रै विद्यार्थी संगठनको विरोधका बाबजुद मंगलबार भृकुटीमण्डपस्थित आर.आर क्याम्पसमा स्ववियु निर्वाचन हुँदैछ । गत फागुन १९ गते हुनुपर्ने निर्वाचन २३ गतेका लागि सारिएको थियो । निर्वाचन आचारसंहिता लागु भएकोले स्ववियु निर्वाचन गर्न नमिल्ने भन्दै प्रशासनले निर्वाचन रोकेको थियो । यही चैत २ गते आरआरका एमाले निकट अखिलका उमेदवार तपेन्द्रबहादुर शाहीले हालेको रिटमा सर्वोच्च अदालतले निर्वाचन गराउन आदेश दिएको थियो ।

एकतर्फी रुपमा निर्वाचन गराउँन लागेको भन्दै एमाओवादी निकट अखिल क्रान्तिकारी लगायत अन्य विद्यार्थी संगठनले भने निर्वाचन बहिस्कार गरेका छन् । अन्नपूर्णसँग कुरा गर्दै अखिल क्रान्किारीका उपाध्यक्ष अनिल शर्माले आफूहरुलाई झुक्याएर क्याम्पस प्रमुख र एमाले अखिलले स्ववियु निर्वाचन गर्न लागेको आरोप लगाए ।

आफ्नो संगठनका कतिपय उमेदवार रोजगारीका लागि विदेश गएको, कोही गाउँ गएको र कोही परीक्षाको तयारीमा लागिरहेको अवस्थामा कुनै छलफल नै नगरी निर्वाचन घोषण गरिएकोले त्यसको विरोध र बहिस्कार गरेको शर्माले जानकारी दिए । सर्वोच्चमा समेत अखिलले गलत सूचना दिएर रिट हाली अदालतको दुरुपयोग गरेको उनको जिकिर छ । निर्वाचनको एकदिन अधिमात्रै चोरबाटोबाट नेविसंघको उमेदवारी दर्ता गर्नु अदालतको आदेश विपरित रहेको शर्माले बताए ।

नेविसंघले भने हिजो मात्रै उमेदवारी दर्ता गरेर निर्वाचनमा भाग लिन लागेको छ । पहिला आफ्नो संगठनको उमेदवारी दर्ता नभएकोले विरोध गरेको र अहिले उमेदवारी दर्ता भएकाले निर्वाचनमा भाग लिन लागेको नेविसंघका केन्द्रीय सदस्य डम्बर जोसीले बताए । साभार:अन्नपुर्णपोस्ट