जेठ २७ ,काठमाडौं । रक्षामन्त्री ईश्वर पोख्रेलले अन्तर्राष्ट्रिय सीमाहरूमा सामान्य अवस्थामा भौतिक रूपमा हतियारसहित सेना नपठाइने चलन रहेको बताएका छन् । प्रतिनिधिसभाको बैठकमा विनियोजन विधेयकमाथिको छलफलका क्रममा उठेका प्रश्नको जवाफ दिने क्रममा उनले यस्तो बताएका हुन् ।
सिमानामा युद्ध, आक्रमण भए राष्ट्रिय सुरक्षा परिषद्को सिफारिसमा मन्त्रिपरिषद्को निर्णयबमोजिम राष्ट्रपतिबाट सेना परिचालन हुने संवैधानिक व्यवस्था रहेको पनि उनले संसदमा स्मरण गराए । यसरी सेना परिचालनको निर्णय भए नेपाली सेना सीमा सुरक्षामा जतिसुकै बेला खटिन तयार रहेको पनि मन्त्री पोख्रेलले बताए ।
त्यस्तै, उनले विकास निर्माण र विपत् व्यवस्थापनमा सेना परिचालन संविधानमा भएको व्यवस्थाअनुसारै भएको पनि बताए । अपरधाका घटनामा आएका विविधता, प्राकृतिक घटनामा वृद्धि, भौगोलिक सीमा सुरक्षा गर्नुपर्ने आवश्यकतालगायतको अवस्थाका कारण सेनाको संख्या घटाउनुपर्ने अवस्था नरहेको पनि उनले प्रस्ट पारे ।
फास्टट्र्याक सेनालाई किन ?
रक्षामन्त्री ईश्वर पोखे्रलले द्रुत मार्ग (फास्ट ट्र्याक) समयमै सम्पन्न गर्न सेनालाई जिम्मा दिइएको बताए । “फास्ट ट्र्याक गेम चेन्जर आयोजना हो । तराई–मधेसलाई काठमाडौंसँग छोटो दूरीमा जोड्छ । राष्ट्रिय गौरवको आयोजना उच्च गुणस्तरका साथ सम्पन्न हुन सकोस् भनेर यसको जिम्मा सेनालाई दिइएको हो,” उनले भने ।
