काठमाडौं, ५ कात्तिक । एमाले अध्यक्ष केपी शर्मा ओलीले बोलेजस्तै गुन्डा नाइकेलाई प्रदेश र प्रतिनिधि सभामा उम्मेदवार नबनाउने निर्णय एमालेले गुन्डा नाइके दिपक मनाङेको हकमा लिएको छ ।
मनाङ ‘ख’का लागि प्रदेश सभा उम्मेदवारमा सिफारिस परेका दिपक मनाङेको नाम काटेर खण्डा लामा गुरूङलाई उम्मेदवार तय गरेको छ । गुरूङ मनाङेसँगै राप्रपाबाट एमालेमा प्रवेश गरेकी थिइन् ।
एमाले स्थायी कमिटिले शनिबार राती मनाङेको विकल्पमा उम्मेदवार तय गरेको थियो । जिल्लाबाट सर्वसम्मत रूपमा आए पनि र जित्ने निश्चित हुँदा हुँदै पनि एक सिटका कारण देशभर एमालेको बद्नाम हुने भन्दै शीर्ष नेताहरूले दीपक मनाङेलाई टिकट नदिने निर्णय गरेको हो ।
यता, मनाङे भने एमालेको बागी उम्मेदवार भएर चुनावको तयारीमा रहेका छन् । मनाङेले स्वतन्त्र उम्मेदवारी दर्ता गरेका छन् ।
