२० साउन,एजेन्सी – दुबईमा रहेको एक ७९ तले अग्लो अवासीय भवनमा भीषण आगलागी भएको छ । दुबईमा रहेको टर्च टावरमा पछिल्ला २ बर्षमा दोस्रो पटक आगलागी भएको हो ।
यद्धपि आगलागीको कारण अहिलेसम्म खुल्न नसकेको बिबिसीले जनाएको छ । भवनमा बसिरहेका मानिसहरुले तत्कालै भवन खालि गराएकाले मानवीय क्षति नभएको र अहिले आगो पनि नियन्त्रणमा आईसकेको समाचारमा उल्लेख छ ।
सामाजिक सञ्जालमा पोस्ट गरिएका भिडियो फुटेजहरुमा आगलागी भवनको माथिल्लो तल्लामा सम्म पुगेको देख्न सकिन्छ । सरकारी सञ्चारमाध्यम दुबई मिडिया अफिसले ट्वीट गर्दै घट्नामा परि अहिलेसम्म कोहि पनि घाईते नभएको जानकारी दिएको छ ।
टर्च टावरमा यसअघि सन् २०१५ मा पनि आगलागी भएको थियो । ७९ तले टर्च टावर सन् २०११ देखि आवासका लागी खुला गरिएको थियो । सञ्चालनमा आउँदा यो टर्च टावर बिश्वकै सबभन्दा अग्लो भवन मानिएको थियो । यसमा ६ सय ७६ फ्ल्याट रहेका छन् ।
