छोरा जन्माउनुपर्यो भन्दै बिवाह गर्दै घरभरी श्रीमती

छोरो चाहिन्छ, छोरो जन्माउँछु भनेर श्रीम तीहरु भित्र्याउँदैगएँ; छओटी श्रीमति भित्र्याएँ”, रोल्पाको थवाङ, ठूलोगाउँका ५९ बर्षीय हित पुनले ठूलै बहादुरी नै गरेझैं बर्णन गरे।

पुनको पहिलो विवाह उनी १६ वर्ष हुँदा १४ वर्षीया किशोरीसँग भएको थियो । तिनीबाट दुई छोरी छन् । ३० वर्षको हुँदा १७ वर्षीया किशोरीलाई दोस्रो श्रीमतीका रुपमा भित्र्याए । तिनीबाट सन्तान भएनन् । त्यसपछि उनले एकपछि अर्को गर्दै केही वर्षको फरकमा २० देखि २२ वर्ष उमेरका किशोरीलाई भित्र्याउने क्रम जारी रह्यो । त्यसमध्ये उनकी एउटी श्रीमती करीब २२ वर्षकी छिन्। यसअघि ५६ वर्षको हुँदा उनले पाँचौँ श्रीमतीका रुपमा पाकै उमेरकी विधवा महिलासँग प्रेम विवाह पनि गरेका थिए। तिनीबाट पनि छोरा नभएपछि एक वर्ष पहिले २१ वर्षीया युवतीलाई श्रीमतीका रुपमा भित्र्याएको उनको भनाइ छ । 

छैटौँ श्रीमतीबाट भने उनको छोरा जन्माउने धोको पूरा भएको छ। तर सुखी जीवन जीउने सपना भने साकार हुन सकेको छैन । उनकी कान्छी श्रीमती चौबिसै घण्टा मदिरा सेवन गर्छिन्, जस्ले उनलाई मानसिक तनावमा पारेको छ। करीब चार महिनाको बच्चा धुरुधुरु रोइरहँदा पनि बच्चा सम्हाल्न नसक्नेगरी मदिरा सेवन गर्नुले यो परिवारलाई विक्षिप्त बनाएको छ ।

लोग्नेले यताउति गर्दै कमाई गरेर घर फर्कंदा टन्नै मदिरा पिएर श्रीमती एकातिर लडिराखेकी र चार महिनाको बच्चा अर्कोतिर रोइरहँदा वरपरका छिमेकीलाई समेत हैरानी हुने गरेको छिमेकीले बताएका छन् । यसरी विवाह गरेका अन्य श्रीमतीले छोडेपनि उनका तीनवटी श्रीमती भने उनकै संरक्षणमा फरक फरक स्थानमा बस्दै आएका छन् ।