प्रधानमन्त्री दाहालविरुद्धको रिटमा आज प्रारम्भिक सुनुवाइ हुँदै

२५ फागुन ,काठमाडौं । प्रधानमन्त्री तथ नेकपा (माओवादी केन्द्र) का अध्यक्ष पुष्पकमल दाहालविरुद्धको रिटमा सर्वोच्च अदालतमा आज सुनुवाइ हुँदैछ । रिटमा आज प्रारम्भिक सुनुवाइ हुनेछ ।

इजलासले सुनुवाइपछि विपक्षी बनाइएका दाहाल, प्रधानमन्त्री कार्यालय, गृह, रक्षा, कानुन मन्त्रालय र प्रहरी प्रधान कार्यालयलाई निश्चित समय तोकी लिखित जवाफ पेश गर्दै अदालतमा उपस्थित हुन आदेश दिन सक्छ ।

सोमबार दाहालविरुद्ध ज्ञानेन्द्रराज आरण र कल्याण बुढाथोकीले दुई भिन्न रिट दायर गरेका थिए ।

निवेदकहरुले दाहालद्वारा २०७६ साल माघ १ गते टुँडिखेलमा आयोजित एक कार्यक्रममा द्वन्द्वकालमा भएका १७ हजार हत्या मध्ये ५ हजार हत्याको जिम्मेवारी लिने अभिव्यक्तिलाई मध्यनजर गर्दै उनीविरुद्ध ती हत्याको अभियोजन दायर भई अदालतबाटै निरुपण हुनु पर्ने माग गरेका छन् ।

रिटमा आज प्रारम्भिक सुनुवाइ हुनेछ । प्रारम्भिक सुनुवाइमा निवेदक तर्फबाट बहस हुन्छ । विपक्षी प्रत्यर्थीले प्रारम्भिक सुनुवाइमै सरिक हुनका लागि निवेदन दिएमा प्रत्यर्थी समेतले बहस गर्न पाउँछन् ।

रिटमा दाहालको अभिव्यक्तिको आधारमा अभियोजन दायर हुनुपर्ने हुँदा तत्काल उनलाई पक्राउ गर्न अन्तरिम आदेशको पनि माग गरिएको छ ।