उपप्रधानमन्त्री श्रेष्ठले भारतीय राजदूत श्रीवास्तवको साथमा गरे कमलविनायक–नगरकोट सडकको अनुगमन

१८ फागुन, भक्तपुर । उपप्रधानमन्त्री एवम् भौतिक पूर्वाधार तथा यातायात मन्त्री नारायणकाजी श्रेष्ठले नेपालको लागि भारतीय राजदूत नवीन श्रीवास्तवको साथमा कमलविनायक–नगरकोट सडकको संयुक्तरुपमा अनुगमन गरेका छन्।

बिहीबार बिहान गरिएको अनुगमनमा उनीहरूको साथमा मन्त्रालयका सचिव, सडक विभागका डिजी, सम्बन्धित आयोजना प्रमुख, ठेक्का पाएका निर्माण कम्पनीका प्रतिनिधि पनि सँगै रहेका थिए ।

कमलविनायक–नगरकोट सडकको ठेक्का नेकपा माओवादी केन्द्रका अध्यक्ष पुष्पकमल दाहालका घरबेटी शारदा अधिकारीको शैलुङ कन्स्ट्रक्सनले पाएको थियोे । पहुँचका आधारमा अधिकारीले यो सडकको मात्र होइन, अन्य थुप्रै सडक आयोजनालाई अलपत्र पारेका छन् । अधिकारीले राजनीतिक पहुँचको फाइदा लिँदा सरकार मुकदर्शक बन्ने गरेको स्थानियको आरोप छ ।

उपप्रधानमन्त्री श्रेष्ठ अनुगमन गर्न आउने खबरले बर्सौंदेखी अलपत्र सडकमा रातभरि दर्जनौं डोजर र स्काभेटरहरु गुडाएर सडक मर्मतको नाटक गर्दै स्थानीयहरुलाई सुत्न नदिएको गुनासो स्थानीयहरुले मन्त्री श्रेष्ठ संग गरेका थिए ।

केही दिनअघि उपप्रधानमन्त्री श्रेष्ठ र नेपालको लागि चिनियाँ राजदूतले चक्रपथको अनुगमन गरेका थिए।