‘माधव नेपालले कुन नैतिकताले विधिको कुरा गर्दैछन् ?’

नेपाल कम्युनिस्ट पार्टीका तेस्रो वरियताका नेता माधवकुमार नेपालले पार्टी विधि र पद्दतिअनुरूप नचलेको भन्दै ‘सङ्घर्ष’ शुरू गरेपछि ने क पा विवाद सतहमा आएको छ । र, पक्ष विपक्षमा नेताहरू खडा भएका छन् ।

तर, पूर्वमाओवादी निकट नेताहरू भने माधव नेपालको पछिल्लो कमदको विरुद्धमा देखिएका छन् ।

बिहीबार प्रतिनिधिसभाको वर्षे (बजेट) अधिवेशन अन्त्यका दिन बोल्दै नेता नेपालले “गृहमन्त्रालय कहाँ छ ? गृहमन्त्री कहाँ हुनुहुन्छ ?” भन्दै प्रतिपक्षभन्दा चर्को स्वरमा सरकारको आलोचना गरेको भन्दै नेपालको गतिविधिप्रति असन्तुष्टि राखेका हुन् ।

सचिवालयकै एक प्रभावशाली नेताले बाह्रखरीसँगको अनौपचारिक कुराकानीमा भने, “सरकारको कामकारवाहीप्रति म पनि सन्तुष्ट छैन । तर, माधव नेपाल जसरी संसदमा प्रतिपक्षीभन्दा चर्को रूपमा प्रस्तुत हुनुभयो, त्यो पनि ठीक होइन ।”

झलनाथलाई पन्छाएर वरिष्ठ नेता बन्ने नेपालले कुन नैतिकताको कुरा उठाएको ?

त्यस्तै उनले पार्टी एकताकाबेला आफू चौथो वरियतामा रहँदारहँदै केपी ओलीसँग मिलेर झलनाथ खनालको वरिष्ठता मिचेको भन्दै अहिले नैतिकता, विधि, पद्दतिको कुरा उठाउनु कुनै हालतमा जायज नभएको टिप्पणी गरे । उनले भने, “माधव नेपालले भन्दा मैले विधि र पद्दतिको कुरा उठाएको छु । तर, अहिले आफ्ना मान्छेलाई नेता बनाउनमात्रै विधि र पद्दतिको कुरा उठाइरहनुभएको छ । यो ठीक भएन ।”

त्यस्तै उनले ईश्वर पोखरेललाई महासचिवबाट हटाएर जुनिएर मान्छे महासचिवमा ल्याउँदा पनि विधिको कुरा नउठाएको भन्दै माधव नेपालको पछिल्लो कदम ‘अनावश्यक’ भएको टिप्पणी गरे ।

‘भ्रममा नपरौँ, एकता सुदृढ हुन्छ !’

ने क पाभित्र गुटको खेल शुरू भएपछि पार्टी प्रवक्ता एवम् सचिवालय सदस्य नारायणकाजी श्रेष्ठले पनि भ्रममा नपर्न आग्रह गरेका छन् । माइक्रो ब्लगिङ साइट ट्विटरमार्फत नेता श्रेष्ठले  भनेका छन्, “हाम्रो पार्टीको सामान्य विषयमा भएको छलफललाई अतिरञ्जित ढंगले प्रचार गर्नुको कुनै अर्थ छैन ।”

उनले थपेका छन्, “सामाजिक न्यायसहितको समृद्धिको तात्कालीन लक्ष्य र समाजवादको दीर्घकालीन लक्ष्यलाई केन्द्रमा राखेर सबै नेपाली कम्युनिष्टहरूलाई एउटै पार्टीमा गोलबन्द गर्न बनेको नेकपाको एकता सुदृढ हुनेछ । भ्रममा नपरौं ।”

त्यस्तै उनले अघिल्लो ट्विटमा लेखेका छन्, “वर्तमान सरकारप्रतिको आलोचना–टिप्पणी  सरकारलाई थप प्रभावकारी एवम् सफल बनाउने उद्देश्यले हुनुपर्छ । यतिबेला यो सरकारको विकल्पको सोच देश, जनता, पार्टी र आन्दोलनको पक्षमा हुँदैन । अहिले त्यस्तो कल्पना गर्नु पनि गलत हुन्छ । कसैले त्यस्तो सोचेका छन् जस्तो पनि लाग्दैन ।”