गच्छदारको प्रश्न– कार्यकर्तालाई अरिंगाल बन भनेर मुठभेड खोजेको ? एसपीको छोरा राज्यले नै जोगाउन मिल्छ ?

प्रमुख प्रतिक्षी नेपाली कांग्रेस संसदीय दलका उपनेता विजयकुमार गच्छदारले प्रधानमन्त्री केपी शर्मा ओलीले मुलुकमा मुठभेड निम्त्याउन चाहेको आरोप लगाएका छन् । बिहीबार संसदलाई सम्बोधन गर्दै कांग्रेस उपनेता गच्छदारले सत्तारुढ पक्षका सांसद र नेता–कार्यकर्ताहरुलाई ‘अरिंगाल’ बन्न निर्देशन दिएर ओलीले मुठभेड निम्त्याउन चाहेको आरोप लगाएका हुन् ।

‘‘राज्य अत्यन्तै निरीह देखिएको छ । प्रधानमन्त्री ओलीजी आफ्ना सांसदहरुलाई बोलाएर सरकारका नराम्रा कामको पनि प्रतिरक्षा गर्न निर्देशन दिनुहुन्छ । अरिंगाल बनेर विपक्षीमाथि खनिन उत्प्रेरित गर्नुहुन्छ,’’ उनले भने, ‘‘लड्न–भिड्न उत्प्रेरित गरेर के उहाँले देशलाई मुठभेडतर्फ धकेल्न खोजेको हो ?’’ 

उपनेता गच्छदारले दुईतिहाईको कम्युनिष्ट सरकार मुलुकमा शान्ति सुरक्षा कायम गर्न असफल भएको बताए । ‘‘यो सरकार गठन भएको साढे ७ महिनाको अवधिमा शान्ति–सुरक्षा नाजुक छ । सरकारले हत्या–हिंसा र बलात्कारका घटनाहरु नियन्त्रण गर्न सकेको छैन् । संसदीय अभ्यास शुरु देखिएको इतिहासमा अहिलेसम्म यस्तो थिएन,’’ उनले भने, ‘‘सरकार शान्ति–सुरक्षा कायम गर्न असफल देखियो ।’’

गच्छदारले यसअघि पनि हत्या हिंसाका घटनाहरु हुँदै आएको भन्ने गृहमन्त्री रामबहादुर थापाको अभिव्यक्तिको तिव्र आलोचना गरे । ‘‘पहिलेपनि यस्ता घटना हुन्थे भनेर बस्ने कि सरकार सजग हुने ?,’’ गृहमन्त्री थापाको नामै उल्लेख गरेर उनले भने, ‘‘हिजोपनि यस्तो हुन्थ्यो, आजपनि हुन्छ भन्नु सरकारको दायित्व होइन् । सरकारले अपराध नियन्त्रण गर्नुपर्दछ । अझै केही विग्रेको छैन्, शान्ति–सुरक्षालाई गम्भिरतापूर्वक लिइयोस् ।’’

कांग्रेस उपनेता गच्छदारले कञ्चनपुरकी १३ वर्षीया बालिका निर्मला पन्तका हत्यारा अहिलेसम्म पक्राउ नपरेको प्रति आपत्ति जनाए । ‘‘निर्मलाका हत्यारा पक्राउ नहुने ? के कानुन पर्याप्त नभएरै हो घटनाको छानबिन गर्न आयोग बनाएको ?,’’ उनले प्रश्न गरे, ‘‘राज्यले मेयरको छोरा–भतिजा, एसपीको छोरा भनेर जोगाउन मिल्छ ?’’