सरकार र यातायात व्यवसायीबीच पाँच बुँदे सहमति

यातायात व्यवसायी महासंघ संयुक्त आन्दोलन मूल समितिको पूर्वघोषित सम्पूर्ण आन्दोलनका कार्यक्रम फिर्ता भएको छ । सरकार र यातायात व्यवसायीबीच भएको छलफलबाट ५ बुँदे सहमति भएसँगै यातायात व्यवसायी महासंघ संयुक्त आन्दोलन मूल समितिले यसअघि घोषणा गरेको आन्दोलनका सबै कार्यक्रम फिर्ता भएको हो ।

पाँच बुँदे सहमतिअनुसार यातायात व्यवसायीहरुले सार्वजनिक यातायात क्षेत्रलाई व्यवस्थित बनाउन चालिएको सरकारी कदमको स्वागत गर्दै यातायात क्षेत्रको जुनसुकै प्रकारको सिन्डिकेटको अन्त्य गर्न सहमत भएका छन् ।

त्यस्तै एउटामात्र सार्वजनिक सवारी साधन भएको सवारी धनीले पनि सवारी सञ्चालन गर्न प्रचलित कानून अनुसार पाउने, सर्वोच्च अदालतको परमादेश अनुसारको जाँचबुझ आयोग गठनको प्रक्रिया यथासिघ्र अगाडि बढाउने, यातायात व्यवसायी महासंघ संयुक्त आन्दोलन मूल समिति २०७४ बाट पूर्व घोषित आन्दोलनका सम्पूर्ण कार्यक्रमहरु फिर्ता गर्ने र यातायात क्षेत्रलाई व्यवस्थित एवं प्रभावकारी बनाउन मन्त्रालयलाई यथाशीघ्र राय परामर्श दिन सरोकारवाला समेतको प्रतिनिधित्व रहने गरी एक कार्यदल गठन गर्ने सहमति भएको छ ।

भौतिक पूर्वाधार तथा यातायत मन्त्री रघुबीर महासेठको उपस्थितिमा आइतबार मन्त्रालय र यातायात व्यवसायी महासंघबीच भएको छलफलबाट सो सहमति भएको हाे ।