एनआरएनद्वारा ‘बाढीपिडीत राहत कोष’ स्थापना, ढीपिडीतलाई राहत प्रदान गर्न१ करोड दिने घोषणा

काठमाडौं– बाढीपिडीतलाई राहत प्रदान गर्न गैरआवासीय नेपाली संघले बाढीपिडित राहत कोष स्थापना गरेको छ । बाढीको जोखिममा रहेका हजारौं परिवारलाई तत्कालै उद्दार र आपतकालिन राहतको आबश्यकता परेको भन्दै संघको आइतबार बसेको आकस्मिक बैठकले आपतकालिन सहयोगस्वरुप ’बाढीपिडीत राहत कोष’ स्थापना गरेको हो । 
कोषमा अध्यक्ष शेष घले र जमुना गुरुङको एमआईटी फाउण्डेसनले १ करोड रुपैयाँ सहयोग दिने घोषणा गरेको छ । यस्तै बैठकमा संघका संरक्षक जीवा लामिछाने तथा उपाध्यक्षहरु भवन भट्ट र कुमार पन्त, महासचिव बद्री केसी र सचिव अर्जुन श्रेष्ठले एकएक लाख रुपैयाँ तथा प्रवक्ता रन्जु थापाले ५० हजार रुपैयाँ र कोषाध्यक्ष हिक्मत थापाले ५१ हजार रुपैयाँ सहयोगको घोषणा गरेका छन् । एक साताभित्र दुई करोड रुपैयाँ जम्मा गरी राहत बितरण थाल्ने संघले जनाएको छ । बिश्वभरी छरिएर रहेका  नेपालीहरुलाई आफ्नो गच्छेले भ्याएसम्म रकम सहयोग गर्न र बिपतको घडीमा मातृभूमी र पिडीत दाजुभाई दिदीबहिनीहरुलाई सहयोगको हात अगाडी बढाउन पनि गैरआवासीय नेपाली संघले अपिल गरेको छ ।