भदौ १ गते चुनावको मिति घोषणा गर्न सरकारलाई निर्वाचन आयोगको आग्रह

काठमाडौं, २३ साउन– निर्वाचन आयोगले भदौ १ गते निर्वाचनको मिति घोषणा गर्न सरकारलाई आग्रह गरेको छ । 

सोमबार(आज) दिउँसो प्रधानमन्त्री शेरबहादुर देउवासँग प्रधानमन्त्री कार्यालयमा भेट गर्दै निर्वाचन आयोगका पदाधिकारीले २०७४ माघ ७ भित्र प्रदेश सभा तथा प्रतिनिधिसभा निर्वाचनका लागि मिति तोक्न आग्रह गरेका हुन् । प्रमुख निर्वाचन आयुक्त डा. अयोधिप्रसाद यादवसहितको आयोगको टोलीले यथाशक्य छिटो निर्वाचन सम्बन्धी कानून र क्षेत्र निर्धारण आयोगको प्रतिवेदन प्राप्त हुनु पर्ने तथा आगामी २०७४ भाद्र १ गते निर्वाचनको मिति घोषणा गर्न प्रधानमन्त्रीलाई आग्रह गरेको हो । 

आयोगले प्रदेश सभा र प्रतिनिधि सभाको निर्वाचन दुई चरणमा गर्न व्यवस्थापकीय हिसावले सहज हुने तथा प्रदेश सभा तथा प्रतिनिधि सभाको निर्वाचनमा विद्युतीय मतदान यन्त्र प्रयोग गर्ने भए सरकारको तर्पबाट समेत अग्रसरता हुनुपर्ने बारे प्रधानमन्त्रीलाई स्मरण गराएको आयोगका प्रवक्ता सूर्यप्रसाद शर्माले बताए । 

तेस्रो चरणमा हुन लागेको प्रदेश नम्बर २ को स्थानीय तह निर्वाचनको लागि आयोगले गरेका तयारीको बारेमा समेत प्रधानमन्त्रीलाई आयोगले जानकारी गराएको थियो । 

जवाफमा प्रधानमन्त्री देउवाले समयमै प्रदेश सभा तथा प्रतिनिधि सभा सदस्य निर्वाचनका लागि आवश्यक पर्ने ऐन तथा निर्वाचन क्षेत्र निर्धारण आयोगको प्रतिवेदन आयोगलाई उपलब्ध गराउने प्रतिवद्धता व्यक्त गरे । प्रधानमन्त्रीले विद्युतीय मतदान मेसिनबारे सरकार सकारात्मक रहेको प्रतिक्रिया दिएका थिए ।