भरतपुर २० को मतगणना , प्रमुख पदमा प्रतिष्पर्धा रोचक बन्दै

२१ साउन, काठमाडौं – भरतपुर महानगरपालिका वडा नम्बर २० को ताजा परिणाम सार्वजनिक भएको छ । जारी मतगणनामा एमालेका मेयरका उम्मेदवार देवी ज्ञवालीको अग्रता दोहोरो अंकमा झरेको छ । देवीको माओवादीकी उम्मेद्वार रेणु दाहालसँगको मातान्तर अहिले ७६ मतमा झरेको छ ।

वडा नम्बर १९को गणना सुरु भएपछि लगातार घटिरहेको देवीको अग्रता अोरालो लागिरहेको छ । अब रेणुभन्दा देवी ७६ मतले मात्रै अघि छन् । बैशाख ३१मा भएको भरतपुरको चुनावपछि मतगणनाका क्रममा माओवादी कार्याकर्ताले १९ नम्बर वडाकाे मतपत्र च्यातेपछि फेरि मतदान गरेर मतगणना भइरहेको हो ।

निर्वाचन कार्यालयले दिएको आधिकारिक जानकारी अनुसार १२ सय १ मत गणना हुँदा रेणु दाहालले देबी ज्ञवालीसँगको अग्रता जम्मा ७५ मतमा झारेकी छिन् ।

पछिल्लो मत परिणाम अनुसार देवीले ४२ हजार ३ सय ८ मत ल्याएका छन् भने दाहालले ४२ हजार २ सय ३३ मत पाएकी छिन् । अझ २१ सय मत गणना गर्न बाँकी छ ।

३३ सय २ मत खसको यो वडामा यहि अनुपातमा रेणुले मत ल्याए जित्ने निश्चित देखिएको छ । चार समूह बनाएर मतगणना भइरहेकाले परिणाम छिटो छिटो आइरहेको हो ।