राप्रपा देउवा सरकारमा सहभागी नहुने

काठमाडौं । राष्ट्रिय प्रजातन्त्र पार्टी (राप्रपा) ले शेरबहादुर देउवा नेतृत्वको सरकारमा सहभागी नहुने निर्णय गरेको छ । राप्रपाको शुक्रबार बसेको पदाधिकारी बैठकले सरकारमा नजाने निर्णय गरेको हो ।

राप्रपाका एक नेताले पार्टीले सरकारमा नजाने निर्णय गरेको जानकारी दिए ।

राप्रपाले सरकारमा नजाने निर्णय गरे पनि देउवालाई दिँदै आएको समर्थन भने यथावत राखेको छ ।

यसअघि देउवा नेतृत्वको सरकारमा जान राप्रपा उत्सुक देखिएको थियो । तर, राप्रपाविनै देउवाले १९ मन्त्री थपेपछि राप्रपा रुष्ट बनेको थियो । राप्रपाले सरकारमा सहभागी नहुने राजनीतिक कारण भने खुलाएको छैन ।

प्रचण्ड नेतृत्वको सरकारमा सहभागी भएको राप्रपाले तत्कालीन प्रधानन्यायाधीश सुशीला कार्कीविरुद्ध महाभियोग प्रस्ताव दर्ता भएपछि सरकार त्यागेको थियो । महाभियोगमा सत्तासाझेदार दलबीच छलफल नगरेको भन्दै उसले तत्काल प्रतिक्रिया जनाउँदै सरकार त्यागेको थियो । त्यसयता राप्रपाले सत्तारुढ हुने चाहना राख्दै आइरहे पनि सत्ता टाढिँदै जान थालेको छ ।