ओलीलाई प्रचण्डको जवाफ- प्रश्न गलत थिएनन् सँगै नियत पनि सही थिएन

काठमाडौं, १० जेठ । १० महिनाअघि प्रधानमन्त्रीको उम्मेदवार बन्ने क्रममा एमाले अध्यक्ष केपी ओलीले सोधेको प्रश्नको जवाफ प्रधानमन्त्री प्रचण्डले दिएका छन् ।

एमालेले सदनमा सम्बोधन गर्न नदिएपछि सिंहदरबारबाट जनताको नाममा विशेष सम्बोधन गर्दै उनले भने, ‘जब म प्रधानमन्त्रीको उम्मेदवार थिएँ, एकथरी साथीहरुले संसदमा मलाई उत्तेजनापूर्वक सोध्नुभएको थियो, ‘फास्ट ट्रयाक के हुन्छ ? ओबीओर के हुन्छ ? हुलाकी मार्ग के हुन्छ ?’
उनले विगत सम्झँदै अगाडि भने, ‘ती प्रश्न गलत थिएनन् । तर, सोध्नेहरुको नियत सही थिएन । त्यो प्रश्नमा अविश्वास थियो, चुनौती थियो ।’ ओलीको नामै नलिइकन जवाफ दिइरहेका प्रचण्डले ओलीले टेकेको जमिनमाथि प्रश्न उठाउँदै भने, ‘आफैंमाथि विश्वास नभएपछि मान्छेलाई अरुमाथि पनि विश्वास नहुँदो रहेछ ।’

प्रचण्डले राजीनामा दिँदै भने, ‘फास्ट ट्रयाकलाई लिएर त सरकारमाथि नियोजित दुष्प्रचारको अभियान नै चलाइयो । आज म यो सम्बोधनबाट जवाफ दिँदै छु, अहिलेसम्म केवल राजनीतिक दाउपेचको विषय भएको र कसैको खास प्राथमिकतामा नपरेको फास्ट ट्रयाक अब बन्ने ग्यारेन्टी भयो ।’ उनले राजधानी र तराईबीचको द्रूतमार्ग अब सुनिश्चित भएको र केही दिनमै आफूले त्यसको शिलान्यास गर्ने र नेपाली सेनाले बनाउने स्पष्ट पारे ।

‘मधेश–तराईको समग्र अर्थतन्त्र र जनजीवन नै बदल्ने दुरगामी महत्वको हुलाकी मार्ग पनि अहिले सबैभन्दा तीव्र गतिमा बनिरहेको छ,’ उनले सम्बोधनको क्रममा भने, ‘यो विषय मैले भारतका प्रधानमन्त्रीसँग प्रत्यक्ष रुपमै अत्यन्त प्राथमिकताका साथ उठाएपछि नै हुलाकी मार्ग निर्माणले तीव्रता पाएको हो ।’