प्रचण्डले तत्काल राजिनामा नदिने

६ जेठ, काठमाडौं । काग्रेस र माओवादीबीच भएको सहमति अनुसार जेठको पहिलो साता प्रधानमन्त्री प्रचण्डले राजिनामा दिने र कांग्रेसको नेतृत्वमा सरकार गठन गर्ने मौखिक सहमति भएको थियो । तर प्रधानमन्त्री प्रचण्डले पहिलो साताभित्र राजिनामा दिएनन ।

प्रचण्डले संविधान अनुसार जेठ १५ गते नियमित बजेट ल्याएर मात्र राजिनामा दिने गृहकार्यमा जुटेपछि कांग्रेस सभापति शेरबहादुर देउवा तनाबमा परेका छन् । प्रचण्डले तत्काल सरकारबाट राजिनामा दिएपनि नयाँ सरकार गठन हुन झण्डै दस दिन लाग्ने भएकाले अहिलेकै सरकारले कामचलाउ बजेट ल्याउने तयारीमा प्रचण्ड लागेका छन् ।

देउवाले तत्काल सरकारबाट राजिनामा दिन प्रचण्डलाई दबाब दिएका छन् । तर प्रचण्डले जेठ १५ पछि मात्र राजिनामा दिने अडान लिदै आएको बताइएको छ । प्रचण्डको सचिवालयका एक सदस्यले भने,‘प्रचण्डले बजेट ल्याएपछि मात्र राजिनामा दिनुहुन्छ, यस विषयमा कांग्रेस र माओवादी सहमति नजिक पुगेका छन् ।’ उनका अनुसार पूरक बजेट नआउने भएपछि जेठ १५ मा कामचलाउ बजेट पेश गरेर मात्र राजिनामा दिने तयारीमा प्रधानमन्त्री प्रचण्ड छन् । तर कांग्रेस र माओवादीबीच कहिले राजिनामा दिने भन्ने विषयमा सहमति जुटन सकेको छैन् ।

आगामी जेठ ८ गते बस्ने संसदको बैठकमा प्रधानमन्त्री प्रचण्डले सम्बोधन गर्नको लागि सचिवालयले भाषणको ड्राफ्ट तयार गरिरहेको छ । प्रधानमन्त्री प्रचण्डका राजनीतिक सल्लाहकार चक्रपाणि खनालले यति नै गते राजिनामा गर्ने भन्नेमा मिति तय भइनसकेको बताए । उनले भने,‘सकेसम्म जेठ १५ गते बजेट ल्याएर प्रधानमन्त्रीले राजिनामा दिने विषयमा कांग्रेसँग छलफल जारी छ ।’

कांग्रेसका देउवा निकट एक नेताले भने सहमति अनुसार प्रचण्डले जेठ पहिलो साता नै राजिनामा दिनुपर्ने भएपनि ढिलासुस्ती गरेको बताए । उनले भने,‘प्रचण्डले नौ महिनापछि सरकारको नेतृत्व कांग्रेसलाई दिनुपर्ने थियो, स्थानीय तहको निर्वाचन भएको कारण हामीले एक महिना थपिदियौ, अहिले बजेटको कुरा गरिराख्नुभएको छ, सहमति अनुसार तत्काल प्रचण्डले राजिनामा दिनुपर्छ ।’