यसकारण चुनावअघि सानो मन्त्रिमण्डल

काठमाडौं, जेठ २५–

प्रसंग १

प्रधानमन्त्री शेरबहादुर देउवानिवास बूढानीलकण्ठमा बुधबार कांग्रेसका मन्त्री छान्न बैठक बसिरहँदा नेता रामचन्द्र पौडेल पक्षको छुट्टै बैठक बस्यो । पौडेल समूहको उक्त बैठकमा देउवाले मन्त्री चयनमा आफूहरुसँग कुनै छलफल नगरेको भन्दै सपथ ग्रहण समारोहसमेत बहिस्कार गर्ने निर्णय गर्यो । भलै, अन्तिम समयमा देउवाले पार्टीका सबै पक्षलाई समेटेर आफूले मन्त्रीको चयन गर्ने आश्वासन दिएसँगै पौडेल समूहपनि सपथग्रहण समारोहमा सहभागि भयो ।

प्रसंग २

प्रमुख सत्ता साझेदार दल नेकपा माओवादी केन्द्रको मन्त्री चयनका लागि बुधबारै बैठक त बस्यो । तर लामो रस्साकस्सीपछि तीन जनाको नाम टुंगो लगाइयो । बैठकमा आकांक्षीहरु धेरै भएपछि प्रधानमन्त्री प्रचण्डले अनुभव र कार्यदक्षताको आधारमा भन्दै जनार्दन शर्मा, कृष्णबहादुर महरा र प्रभू शाहलाई मन्त्री बनाउने निर्णय गरे । यद्यपी माओवादीले मन्त्री चयन गरेपनि पार्टीभित्र अन्तरविरोध देखिएको छ । नेता नारायणकाजी श्रेष्ठ प्रकाशले त सामाजिक सञ्जालमार्फ पार्टीभित्र निष्ठाको राजनीति हराएको संकेतसहित कडा प्रतिक्रिया दिइसकेका छन् ।

उल्लेखित दुई प्रसंगले शेरबहादुर देउवा नेतृत्वमा मन्त्रिमण्डल गठन हुँदै गर्दा कांग्रेस र माओवादी केन्द्रलाई मन्त्री चयनमा सकस परेको देखिन्छ । यी पार्टीहरुबीचको आन्तरिक समस्याकै कारण बिहिबार सानो आकारको मन्त्रिण्डल गठन भएको बताइएको छ ।

बुधबार राष्ट्रपति भवन शीतल निवासमा प्रधानमन्त्रीको रुपमा राष्ट्रपति विद्यादेवी भण्डारीबाट पद तथा गोपनियताको सपथ लिएसँगै आफ्नो पार्टीबाट तीन, माओवादी केन्द्रबाट ३ र फोरम लोकतान्त्रिकबाट विजयकुमार गच्छदारलाई लिएर ८ सदस्यीय मन्त्रिमण्डल गठन गरेका थिए । कांग्रेस माओवादी केन्द्रबीच कांग्रेसले ११ र माओवादीले ९ मन्त्रालय सम्हाल्ने तथा बाँकी मन्त्रालय साना पार्टीले सम्हाल्ने गरी समझदारी भएको बताइए पनि दोस्रो चरणको मन्त्रिमण्डल विस्तारमा ढिलाई हुने देखिएको नेताहरुले बताएका छन् ।

कांग्रेस नेता मीन विश्वकर्माले चुनावको मुखमा मन्त्रिमण्डल विस्तार गर्ने चुनौति रहेको बताउँदै सबैलाई मिलाएर अघि बढ्ने प्रयासमा प्रधानमन्त्री रहेको बताए । यद्यपि उनले चुनावको मुखमा थोरै नेतालाई मन्त्री बनाइने र पूर्णता भने चुनावपछि दिइने बताए ।

चुनावी फ्याक्टर

सरकारले आगामी असार १४ गतेको लागि प्रदेश नम्बर १, २, ५ र ७ मा दोस्रो चरणको निर्वाचनको मिति तोकेको छ ।

चुनावको मुखमा मन्त्रीको लफडामा लागिए चुनावी परिणामै असर पुग्ने सम्मको खतरा हुन सक्ने भएकाले अहिले कांग्रेस र माओवादी केन्द्र दुबै मन्त्री चयनमा निकै सावधानीपूर्वक लागिपरेको नेताहरुले बताएका छन् ।

चुनावको मुखमा मन्त्री चयन गर्दा निकै सावधानी अपनाउनु पर्ने हुन्छ, पार्टीभित्र मन्त्रीको आकांक्षी धेरै भएकाले सीमित मन्त्री चयन गरिँदा एकले अर्कालाई असहयोग गर्ने नीति लिने र सोहि नीति चुनावमा पनि प्रयोग भए पार्टीलाई ठूलै घाटा पुग्न सक्छ’, माओवादी केन्द्रका एक नेताले भने । ती नेताले पहिलो चरणमा कृष्णबहादुर महरा, जनार्दन शर्मा र प्रभू शाह बनाइएपनि दोस्रो चरणका मन्त्री चयनमा भने चुनावकै कारण ढिलाई हुन सक्ने बताए ।

यसो त कांग्रेसभित्र विभिन्न गुटउपगुटलाई समेत मिलाउनु पर्ने तथा अन्तरघातको इतिहाससमेत डरलाग्दो भएकाले मन्त्री चयनमा कांग्रेस थप चनाखो रहेको देउवा निकटका एक नेताले बताए । ती नेताले अहिले नै देखि बूढानिलकण्ठमा मन्त्रीको लबिङ गर्दै पुग्नेहरुको भीड बढेको भन्दै देउवाले चुनावअघि मन्त्री चयन नहुने जवाफ दिँदै फिर्ता पठाइदिने गरेको बताए ।


चुनावअघि मन्त्रीमण्डल विस्तार भएपनि निकै कम नेताहरुलाई मन्त्री बनाउने तयारीमा माओवादी र कांग्रेसकै नेतृत्व रहेको बताइन्छ । यसले चुनावी समीकरण मिलाउन सहज हुने उनीहरुको विश्वास छ । चुनाव पछि भने पार्टीभित्र विवादै भएपनि बढीसे बढी सहमतिको आधारमा मन्त्रिमण्डललाई पूर्णता दिने दिशामा देउवा लाग्ने बताइएको छ ।

चुनावको मुखमा मन्त्री बनाउँदा पार्टीमा आउन सक्ने विवादलाई ध्यानमा राखेर चुनावअघि मन्त्रीमण्डल कसरी विस्तार गर्दै जाने भन्ने विषयमा देउवा र माओवादी केन्द्रका अध्यक्ष प्रचण्डबीच बुधबार साँझ छलफल समेत भएको स्रोतको भनाई छ। देउवा र प्रचण्डबीच लाजिम्पाटमा छलफल भएको थियो ।

राप्रपाको लफडा

कमल थापा नेतृत्वको राप्रपा देउवा नेतृत्वको सरकारमा जाने तयारीमा रहेको छ । तर, देउवाले राप्रपालाई उपप्रधानमन्त्री बाहेकको ४ मन्त्रालयमात्रै दिन सकिने जवाफ दिएका छन् । संसदको चौथो शक्ति भएपनि गच्छदारले उपप्रम पाउने तर आफ्नो पार्टीले किन नपाउने भन्दै राप्रपाले सम्मानजक हैसियतको माग गर्दै आएको छ । तर, राप्रपा स्रोतका अनुसार नेता पशुपति शमशेर राणाले कुनै पनि हालतमा सरकारमा जानुपर्ने भनि पार्टीभित्र आवाज उठाएकाले कमल थापा दबाबमा छन् । सोहि कारण उपप्रम पाए कमल थापानै पार्टीको नेतृत्व पाए सरकारमा जानेछन् भने नपाए आफूनिकट नेताको नेतृत्वमा सरकारमा पठाउनेछन् । अहिलेसम्म पनि राप्रपा उपप्रम पाइने आशामा बार्गेनिङमा रहेकाले सरकारमा जान ढिलाई भएको एक शीर्ष नेताले बताए । ती नेताका अनुसार कांग्रेस र माओवादी केन्द्रका नेताहरुसँग उपप्रधानमन्त्रीसहित राप्रपा सरकारमा जाने विषयमा संवाद भएपनि ठोस सहमति नहुँदा ढिलाई भएको हो ।

 

photo

NOC1-250x300