२५ बैशाख, काठमाडौं । एक सहसचिवलाई लिएर मन्त्रिपरिषद बैठकमा मन्त्री र मुख्यसचिवबीच बाझाबाझ भएको छ । झण्डै हात हालाहालको अवस्था आएपछि बैठकको अध्यक्षता गरिरहेका प्रधानमन्त्री प्रचण्डले हस्तक्षेप गरेका छन् ।
सोमबार बसेको मन्त्रिपरिषद् बैठकमा विज्ञान तथा प्रविधिमन्त्री प्रेमबहादुर सिंहले सहसचिव रामआधार साहलाई प्रशासन समूहमा ल्याउन प्रस्ताव गरेका थिए । उनी प्राविधिक समूहका हुन् । उनलाई प्रशासन समूहमा पटक-पटक प्रस्ताव आएपछि मुख्य सचिव सोमलाल सुवेदीले रोक्दै आएका थिए ।
सोमबारको बैठकमा पनि उनले यो प्रस्तावको विरोध गरे । प्राविधिक समूहमा नै जनशक्ति अभाव रहेको भन्दै उनले साहलाई प्रशासन समूहमा ल्याउन नहुने बताए ।
मुख्यसचिव सुवेदीले यसो भनिरहँदा वातावरणमन्त्री सिंहले ‘तपाई चुप लाग्नुस्’ भनेका थिए ।
लगतै सामान्य प्रशासनमन्त्री केशवकुमार बुढाथोकी जंगिए । अंग्रेजीमा बोलेका उनले मुख्यसचिव सुवेदीमाथि व्यक्तिगत रुपमा साहलाई रोकेको आरोप लगाए । पछिल्लो ६/७ महिनादेखि नै साहलाई मुख्यसचिवले रोकेको उनको आरोप थियो ।
तर, मुख्यसचिवले मन्त्रीको आरोपको खण्डन गरे । आफूले सिस्टम जोगाउन खोजेको उनको तर्क थियो ।
एक मन्त्रीले भने, ‘त्यसपछि सबै बोल्न थाले र बाझाबाझको अवस्था सिर्जना भयो । झण्डै हात हालाहालकै अवस्था आएपछि प्रधानमन्त्रीले हस्तक्षेप गर्नुभयो ।’
प्रधानमन्त्री प्रचण्डले मध्यमार्गी बाटोका रुपमा परामर्शका लागि लोकसेवा आयोगमा पठाउने बताए । यसका लागि प्रस्ताव चाहिने मुख्य सचिव सुवेदीले बताए ।
तर, उनको बोली भूईँमा खस्न नपाउँदै सामान्य प्रशासनमन्त्री बुढाथोकीले हातमै बोकेर ल्याएको छु भन्दै दिएका छन् । अब सहसचिव साहको समूह परिवर्तन गर्ने कि नगर्ने भन्नेमा लोकसेवा आयोगको परामर्श लिइने एक मन्त्रीले बताए ।
२०७४ वैशाख २५ गते १७:१५ मा प्रकाशित
