१७ चैत, काठमाडौं । मधेस प्रदेशमा स्थानीय तहको चुनाव दोस्रो चरणमा हुने चर्चा चलिरहेकै बेला प्रधानमन्त्री पुष्पकमल दाहाल प्रचण्डले एकै चरणमा देशभरि चुनाव हुने स्पष्ट पारेका छन् ।
चीनबाट स्वदेश फर्केको भोलिपल्ट विहीबार प्रधानमन्त्री प्रचण्डले निर्वाचन आयुक्तहरुलाई बालुवाटारमा बोलाएर छलफल गरेका छन् । सो छलफलमा प्रधानमन्त्रीले बैशाख ३१ गते एकै चरणमा निर्वाचन सम्पन्न गर्नुपर्ने बताएका हुन् ।
प्रधानमन्त्रीले निर्वाचनका लागि राजनीतिक वातावरणसमेत बन्ने भन्दै आयुक्तहरुलाई विश्वस्त गराएका छन् ।
प्रधानमन्त्री प्रचण्डलाई भेट्न बिहीबार आयोगका प्रमुख आयुक्तसहित सबै आयुक्तहरु प्रधानमन्त्रीको निवास वालुवाटार पुगेका थिए । त्यस क्रममा निर्वाचन आयुक्तहरुले निर्वाचनका लागि अहिलेसम्म भएका तयारी र गर्न बाँकी कामहरुबारे प्रधानमन्त्रीलाई जानकारी गराएका थिए ।
आयुक्तहरुले अहिलेसम्म मतदाता नामावली तयार भएको, अधिकाशं मतदान केन्द्र तोकिसकेको, मतपत्र छाप्ने काम भइरहेको, मतपेटिका व्यवस्थापन र निर्वाचन सामाग्री लगायतका विषयमा जानकारी गराएका थिए ।
प्रधानमन्त्रीसँगको भेटपछि अनलाइनखबरसँग कुराकानी गर्दै आयुक्त नरेन्द्र दाहालले भने, ‘प्रधानमन्त्रीज्यूले अहिले देखिएका सबै राजनीतिक समस्या चाँडै समाधान हुन्छ, राजनीतिक अन्योलबारे विना चिन्ता निर्वाचनको तयारी गर्नुस् भनेर हामीलाई उत्साहित बनाएर पठाउनुभएको छ ।’
प्रमुख आयुक्त र आयु्क्तहरुलाई प्रधानमन्त्रीले यदि राजनीतिक सहमति नभएमा त्यसको पनि उपाय रहने बताएको आयुक्त दाहालले बताए । उनले अघि भने, ‘प्रधानमन्त्री ज्यूले कुनै हालतमा चुनाव नरोक्ने र त्यही अनुसार निर्वाचन तयारी बनाउन भन्नुभएको छ ।’
सरकारले बैशाख ३१ गते स्थानीय तहको चुनावका लागि मिति घोषणा गरे पनि विवादित दुई नम्बर प्रदेशमा बेग्लै मितिमा चुनाव हुने सक्ने अनुमान लगाइँदै आएका बेला प्रधानमन्त्रीले एकै दिन चुनाव गरिने स्पष्ट पारेका हुन् ।
यसैक्रममा चीनबाट फर्केकै दिन बुधबार प्रधानमन्त्री प्रचण्डले चुनाव हुँदैन कि भनेर प्रश्न नगर्न आग्रह गरेका थिए ।
