नयाँ शक्ति र फोरमबीच एकताको लागि बन्यो ‘पार्टी एकता संयोजन समिति’

Upendra_Baburam

काठमाडौं, ८ वैशाख । लामो समयदेखि एकताको गृहकार्य गर्दै आएका नयाँ शक्ति पार्टी, नेपाल र संघीय समाजवादी फोरमले पार्टी एकीकरणलाई अन्तिमरुप दिन ‘पार्टी एकता संयोजन समिति’ गठन गरेका छन् ।

संयोजन समितिमा डा. बाबुराम भट्टराई, उपेन्द्र यादव र अशोक राई रहेका नयाँ शक्ति पार्टी, नेपालले जानकारी दिएको छ ।

शुक्रबार बिहान जारी गरिएको संयोजक डा. भट्टराई र अध्यक्ष उपेन्द्र यादवद्वारा हस्ताक्षरित विज्ञप्तिमा भनिएको छ, ‘नयाँ शक्ति पार्टी, नेपाल र सङ्घीय समाजवादी फोरम, नेपालबीच पार्टी एकताको प्रयोजनार्थ दुबै पार्टीका तर्फबाट वार्ता समिति गठन गरी विभिन्न चरणका वैठकहरुमार्फत पार्टीले अवलम्बन गर्ने नीति, सिद्धान्त, विचार र संगठनात्मक प्रणाली समेतमा समान दृष्टिकोण बन्दै गएको सन्दर्भमा पार्टी एकतालाई निष्कर्षमा पुर्‍याउनका लागि ‘पार्टी एकता संयोजन समिति’ गठन गर्ने निष्कर्षमा पुगिएको छ ।’

विज्ञप्तिमा जनाइएअनुसार यस समितिले ‘वर्तमान आन्दोलनमा कार्यगत एकताको माध्यमबाट सहकार्य गर्दै पार्टी एकताको कार्यलाई यथाशीघ्र तार्किक निष्कर्षमा पुर्‍याउने सहमति भएको छ’ उल्लेख गरिएको छ ।

विज्ञप्तिमा भनिएको छ, ‘हामी नेपाल सरकारसँग सङ्घीय गठबन्धन, संयुक्त लोकतान्त्रिक मधेशी मोर्चा तथा ६८ दलीय संयुक्त संघर्ष समितिले अगाडि सारेका मागहरुलाई सम्बोधन गरी निर्वाचनको वातावरण बनाउन अनुरोध गर्दछौं ।’

 

photo

NOC1-250x300