काठमाडौं, २ पुस – नेकपा एमालेका अध्यक्ष तथा वाम गठबन्धनका नेता केपी ओलीले प्रधानमन्त्री शेरबहादुर देउवाले खेल सुरु भइसकेपछि नियम परिवर्तन गर्न थालेको आरोप लगाएका छन् ।
वाम गठबन्धनले आइतबार होटेल अन्नपूर्णमा आयोजित पत्रकार सम्मेलनमा अध्यक्ष ओलीले यस्तो आरोप लगाएका हुन् । ‘खेल सुरु भइसकेपछि नियम परिवर्तन गर्न मिल्छ,’ ओलीले प्रश्न गर्दै भने, ‘राजनीतिमा नैतिकता हुन्छ कि हुन्न ? जनमतको सम्मान हुन्छ कि हुँदैन ?’ उनले देउवा सरकारले जनमतको सम्मान गरेर बाटो खुला गर्नुपर्नेमा जोड दिए ।
उनले राष्ट्रपतिले प्रधानमन्त्रीले पठाएको विधेयक जारी गर्न नमिल्ने धारणा राखे । ‘शेरबहादुरजीले प्रधानमन्त्रीको कुर्सीमा बसेर राष्ट्रपतिलाई आरोप लगाइरहनुभएको छ,’ ओलीले भने, ‘राष्ट्रपतिले संविधानको भावनाअनुसार छ कि छैन भन्ने विचार गर्नुपर्छ ।’ उनले प्रधानमन्त्रीले असंवैधानिक काम गर्न राष्ट्रपतिलाई दबाव दिन नहुने धारणा व्यक्त गरे ।
