सम्बृद्धि र सुशासनका लागि प्रधानमन्त्रीसँगै खट्छन् यी तीन मन्त्रीहरु

बैशाख ९ :  प्रधानमन्त्रीमा निर्वाचित  भएपछि केपी ओलीको ब्यस्तता बढेको छ । मुलुकमा पहिलो पटक स्थायी सरकार गठन भएकाले जनताले अनुभुति गर्ने गरि केही नयाँ काम शुरु गर्ने योजनाका साथ प्रधानमन्त्री ओली नेतृत्वको टोलीले केही समययता राति एघार बजेसम्म खटेर काम गरिरहेको छ । आर्थिक सम्बृद्धि र जनताका विकासका सपनासँगै सुशासनको अनुभुति गराउनका लागि प्रधानमन्त्री ओली सहित तीन मन्त्रीहरु र उहाँका सल्लाहकारहरु, केही समयदेखि अध्ययन र अनुसन्धान गर्दै राती अबेर सम्म बसेर काम गर्ने गरेको बालुवाटार स्रोतले काभ्रेपोष्टलाई बतायो ।

प्रधानमन्त्री ओलीको सम्बृद्धिको मार्गभित्रमा परराष्ट्रमन्त्री प्रदीप ज्ञवाली, अर्थमन्त्री डाक्टर युवराज खतिवडा र सञ्चार राज्यमन्त्री गोकुल बाँस्कोटाले राती अबेरसम्म बसेर प्रधानमन्त्री केपी ओलीलाई सहयोग गरिरहनुभएको छ । त्यसैगरी प्रधानमन्त्रीले विषयगत विज्ञ नियुक्त गरेर काम गर्ने योजना अनुसार मुख्य सल्लाहकार विष्णु रिमाल, प्रेस सल्लाहकारमा डाक्टर कुन्दन अर्याल र जनसम्पर्क सल्लाहकार पूर्वसांसद अच्युत मैनालीले पनि राती अबेरसम्म बसेर प्रधानमन्त्री केपी ओलीलाई सहयोग पु¥याइरहेका छन् । अमेरिका, भारत लगायतका मुलुकमा जस्तै सरकारलाई सुझाब दिने गरि गठन हुन लागेको थिङ्ग ट्याङ गठनका लागि पनि प्रधानमन्त्रीले केही समयदेखि गृहकार्य समेत गरिरहनु भएको छ ।

प्रधानमन्त्रीको सचिवालयका अनुसार थिंकट्यांक गठनका लागि ऐनको मस्यौदा बनाउने काम पनि भैरहेको छ । प्रधानमन्त्री निवास बालुवाटारमा सचिवालयले प्रधानमन्त्रीको दैनिकीलाई सहज र व्यवस्थित बनाउने काम गरेको छ । त्यस्तै प्रधानमन्त्रीको आन्तरिक भ्रमण तय गर्ने, भ्रमण योजना बनाउने र समय व्यवस्थापन पनि सचिवालयमार्फत नै हुने गरेको छ । यसअघि ठुलो आकारको सचिवालय हुने गरेकोमा यो पटक सानो आकारमा झारेर प्रधानमन्त्रीले उदहारण प्रस्तुत गरिसक्नुभएको छ ।

प्रधानमन्त्री ओलीले यो पटक थिङ्क ट्याङ्को नयाँ अवधारणा लागू गर्न खोज्नुभएको छ । जसले विभिन्न क्षेत्रमा केन्द्रित भएर प्रधानमन्त्रीलाई सल्लाह, सुझाब दिनुका साथै सहयोग समेत गर्नेछन । जसले सवन्धित क्षेत्रको अध्ययन अनुसन्धान र अवस्था बारेमा प्रधानमन्त्रीलाई आवश्यक सल्लाह सुझाव दिनेछ ।

पछिल्लो समय प्रधानमन्त्री ओली परराष्ट्रमन्त्री प्रदीप ज्ञवाली, अर्थमन्त्री डाक्टर युवराज खतिवडा र सञ्चार राज्यमन्त्री गोकुल बाँस्कोटा, सचिबालय र सल्लाहारसँगै पत्रपत्रिका र सामाजिक सञ्जालमार्फत पनि अपडेट हुने गर्नुभएको छ । उहाँका सार्वजनिक अभिब्यक्ति र भाषणले पनि त्यसलाई प्रष्टाउछ । प्रधानमन्त्रीको सचिवालयका अनुसार कम्तीमा दिनको तीन घन्टा प्रधानमन्त्रीले अध्ययन र सामाजिक सञ्जालमा आएका सूचनामा दिने गर्नुभएको छ । जसले प्रधानमन्त्रीलाई नागरिकको अपेक्षा र सरकारको कामको मुल्यांकन गर्न सजिलो भएको छ ।

प्रधानमन्त्री भारत भ्रमण जानु अघि राती बोलाएर पत्रकारहरुलाई अन्तर्वार्ता दिएकोले पनि राती अबेलासम्म प्रधानमन्त्री काम गर्नु हुन्छ भन्ने जानकारी नेपाली जनताले यस अघि नै पाइसकेका थिए ।