इंग्लिस प्रिमियर लिगमा आज राति ४ खेल हुने

इंग्लिस प्रिमियर लिग फुटबलमा मंगलबार राति ४ खेल हुदैछन् । लिगको दोस्रो स्थानमा रहेको म्यान्चेस्टर युनाइटेडले लिगको आठौं स्थानमा रहेको वाटफोर्डसँग प्रतिस्पर्धा गर्दैछ ।

भिकरेज रोडमा हुने खेलमा घरेलु टोली वाटफोर्ड युनाइटेडलाई रोक्ने प्रयासमा हुनेछ । युनाइटेड भने शतप्रतिशत जित हात पार्ने दाउमा रहेको छ । वाटफोर्डले पनि पछिल्लो दुई खेलमा लगातार जित हात पारेकाले उच्च मनोबल रहेको छ । त्यसो त, युनाइटेडले पछिल्लो दुबै खेलमा जित हात पारेको छ ।

प्रिमियर लिग अन्तर्गत नै मंगलबार राति टोटनह्यामले लेस्टर सिटीको सामना गर्दैछ । आफ्नो किङ पावर स्टेडियममा हुने खेलमा लेस्टर सिटी जितको खोजिमा हुनेछ ।

टोटनह्याम लिगको पाचौं स्थानमा रहेको छ । यता, लेस्टर सिटी भने लिगको १२ औं स्थानमा रहेको छ ।

लिगकै अर्को खेलमा ब्रिगटोनले क्रिस्टल प्यालेससँग प्रतिस्पर्धा गर्दा अर्को खेलमा वेष्ट ब्रुमले न्युक्यास्टलको सामना गर्दैछ ।

लिगको शीर्ष स्थानमा म्यान्चेस्टर सिटी रहेको छ । १३ खेलबाट अपराजित यात्रालाई निरन्तरता दिएको सिटीको ३७ अंक रहेको छ । म्यान्चेस्तर युनाइटेडको २९ अंक रहेको छ । त्यस्तै, लिगको तेस्रो स्थानमा साविक विजेता चेल्सी रहेको छ । चेल्सीको समान १३ खेलबाट २६ अंक रहंदा चौथो स्थानमा रहेको अर्सनलको २३ अंक छ ।