शेरबहादुर देउवाको सासुदेखि मेनपावरका ‘दलाल’सम्म नयाँ राजदूतमा सिफारिस् !

काठमाडौं, १० फागुन । सरकारले सिफारिस गरेको राजदूतहरुको सुचीमा नेपाली कांग्रेसका सभापति शेरबहादुर देउबाको सासुदेखि मेनपावर कम्पनिको दलालसम्म समाबेश भएको पाइएको छ । राष्ट्रिय प्रजातन्त्र पार्टीबाट जापानका लागि सिफारिस भएकी प्रतिभा राणा नेपाली कांग्रेसका सभापति शेरबहादुर देउबाकी सासु हुन् । स्रोतका अनुसार उनलाई राजदुत बनाउन सभापति देउबाको समेत दबाब थियो । यता आफ्नी आमालाई राजदूतमा सिफारिस गर्न छोरी तथा देउबाकी पत्नि आरजु राणा देउबाको समेत चर्को ‘प्रेसर’ थियो

त्यस्तै फोरम लोकतान्त्रिकबाट ओमनका लागि सिफारिस भएकी शर्मिला पराजुलीको धन्दा भने मेनपावर दलाली थियो । उनलाई फोरम लोकतान्त्रिकका अध्यक्ष विजय कुमार गच्छदारले सुटुक्क राजदूतमा सिफारिस गरेपछि फोरम लोकतान्त्रिक भित्र चर्को दबाव समेत परेको थियो । ‘फ्लोरिड रिसोर्स सोलुसन’ नामक मेनपावर कम्पनीकी निर्देशक पराजुलीको नाम लिएर गच्छदार प्रधानमन्त्री कहाँ पुगेका थिए । यस अघि नै मन्त्रिपरिषदको बैठकले सिफारिस गरेको थियो । तर, केपी ओली नेतृत्वको सरकार ढलेपछि पुन अन्यौलता छाएको थियो । फोरम लोकतान्त्रिकसंग कुनै किसिमको ‘संस्थागत सम्बन्ध नदेखिएकी’ पराजुलीको नाम राजदूतमा परेपछि नेताहरू छक्क परेका छन् ।

मधेसमा राजनीतिक आधार भएको फोरमले पार्टीमा कुनै संग्लनता नभएको, पहाडे मुलको त्यो पनि म्यानपावर व्यवसायीलाई नेपाली कामदारहरू काम गर्न जाने खाडी मुलुक ओमानमा राजदूत सिफारिस भएको भन्दै गच्छदारको पार्टीभित्र विरोध भएको थियो ।