कोरोनाले विश्वमा ४ लाख २७ हजार ६३० को मृत्यु, ७६ लाख ९० हजार संक्रमित

चीनको वुहानबाट सुरु भएको कोरोना भाइरसको संक्रमण हालसम्म विश्वका २१६ देशमा फैलिसकेको विश्व स्वास्थ्य संगठनको तथ्यांकमा उल्लेख छ । चीनमा करिब नियन्त्रणमा आइसके पनि विश्वका अन्य देशमा भने यो संक्रमण तिव्र गतिमा फैलिरहेको छ । अमेरिकन देशमा सबैभन्दा धेरै प्रभाव देखिएको भाइरसको संक्रमण तुलनात्मक रुपमा अफ्रिकन देशमा कम फैलिएको छ । 

अमेरिकापछि सबैभन्दा धेरै ब्राजिल र क्रमशः रुस र भारतमा कोरोनाको संक्रमण फैलिएको छ । हाल ब्राजिल, मेक्सिको चिली, भारतलगायत देशमा कोरोनाको संक्रमण तिव्र गतिमा फैलिरहेको छ । 

लामो समयसम्म पनि सामाजिक दूरी कामय गर्दासमेत संक्रमण फैलिन नरोकिएपछि विश्वका अधिकांश देशले लकडाउन खुकुलो गर्दै गएका छन् । लकडाउन खुकुलो गरेपछि संक्रमण झन धेरै फैलिएको भन्दै यसमा पुनरविचार गर्न विश्व स्वास्थ्य संगठनले आग्रह गर्दै आएको छ । केही देशले खुकुलो बनाएको लकडाउनमा पुनः कडाइ गर्ने तयारी गरिरहेका अन्तर्राष्ट्रिय समाचार संस्थाहरुले उल्लेख गरेका छन् । अमेरिकामा पनि लकडाउन खुकुलो पारिएपछि संक्रमितको संख्या बढ्दै गएको बीबीसीले जनाएको छ । तर त्यहाँको अर्थ मन्त्रालयले कोरोना नियन्त्रणका नाममा अर्थतन्त्रमा सम्झौता गर्न नसकिने स्पष्ट पारिसकेको छ । 

सुरुका दिनमा गर्मी मौसम सुरु भएपछि कोरोना संक्रमण आफैं कम हुने भनिए पनि विश्व स्वास्थ्य संगठले आफूसँग त्यस्तो कुनै प्रमाण नरेहको बताइसकेको छ ।