उपल्लो मुस्ताङमा बेमौसमी हिमपात

 उपल्लो मुस्ताङमा बुधबार रातिदेखि बेमौसमी हिमपात भएको छ । हिजो साँझदेखि परेको भारी वर्षातका कारण बाह्रगाउँ, मुक्तिक्षेत्र, दालोमे र लोमान्थाङ गाउँपालिकामा हिमपात भएको हो ।

वैशाख महिनाको अन्तिममा भएको हिमपातको यो पहिलो अनुभव भएको स्थानीय बूढापाकाले बताएका छन् । करीब आधा फिट हिउँ जमेको र बिहानसम्म पनि हिउँ पर्ने क्रम जारी रहेको स्थानीय स्रोतले बताएको छ ।

हिमपात र वर्षासँगै बढेको चिसोका कारण राष्ट्रिय गौरवको बेनी–जोमसोम–कोरला सडकलगायतका विकास आयोजनाको काममा समस्या भएको छ । जोमसोमदेखि उपल्लो मुस्ताङ जोड्ने सडकमा यातायात सेवा समेत प्रभावित भएको छ ।

स्याउ लगायत खेतीबालीमा बेमौसमी हिमपातले असर गर्ने भएकाले कृषक चिन्तित भएका छन् । हिन्दू तथा बौद्ध धर्मावम्बीको साझा तीर्थस्थल मुक्तिनाथ क्षेत्रमा पनि आधा फिटसम्म हिउँ जमेको छ ।

बिहानदेखि हिउँ पर्न रोकिएको र मौसममा सुधार आएकाले भारतीय प्रधानमन्त्री नरेन्द्र मोदीको आसन्न मुक्तिनाथ भ्रमणको तयारीलाई भने असर नगर्ने मुस्ताङका प्रहरी नायब उपरीक्षक रामहरि पाण्डेले बताएका छन् ।

हिमपात, वर्षा र चिसोका बाबजुद पनि मोदीको भ्रमण तथा स्वागतको तयारीमा प्रशासनिक र सुरक्षा निकायले तयारीलाई अन्तिम चरणमा पुर्‍याएका छन् ।

वर्षात्का कारण विभिन्न ठाउँमा पहिरो खसेपछि बेनी-जोमसोम सडक विभिन्न ठाउँमा अवरुद्ध बनेको छ ।

अवरुद्ध सडक खुलाउन बिहानैदेखि कामदार परिचालन गरिएको बेनी-जोमसोम-कोरला सडक आयोजनाले जनाएको छ ।