प्रधानमन्त्री ओलीलाई पूर्वप्रधानमन्त्रीहरुको सुझाव, भारतसँग भाइ भाइको होइन मित्रको सम्बन्ध राख्नुपर्छ

प्रधानमन्त्री केपी शर्मा ओलीले आफ्नो आसन्न भारत भ्रमण सद्ध्भावना भ्रमण भएको बताएका छन् । बालुवाटारमा पूर्व प्रधानमन्त्रीहरुसँगको छलफलमा प्रधानमन्त्री ओलीले आफ्नो भारत भ्रमण देशको हितका लागि हुने समेत स्पष्ट पारे ।

“यसपालीको भ्रमणमा कुनै सन्धी सम्झौता हुँदैनन् । देशको अहितमा कुनै काम गरिँदैन । विगतका सन्धी सम्झौता कार्यान्वयनमा जोड दिइनेछ,” प्रधानमन्त्री ओलीले भने, “यस भ्रमणले दुई देशबीचको सम्बन्ध सुमधुर बनाउन महत्वपूर्ण भूमिका निर्वाह गर्नेछ ।”

छलफलमा पूर्व प्रधानमन्त्रीहरु पुष्पकमल दाहाल, माधव कुमार नेपाल, झलनाथ खनाल, शेरबहादुर देउवा, लोकेन्द्र बहादुर चन्द मन्त्रिपरिषदका पूर्व अध्यक्ष खिलराज रेग्मीको उपस्थिति थियो । पूर्वप्रधानमन्त्रीहरुले  प्रधानमन्त्री ओलीलाई भ्रमणको सफलताको शुभकामना दिएका थिए ।

पूर्वप्रधानमन्त्री माधव नेपालले आफ्नो अडानमा स्थिर हुन प्रधानमन्त्री ओलीलाई सुझाव दिएका थिए । उनले नेपाल भारत सम्बन्ध भाइ भाइको नभई मित्रजस्तो हुनुपर्ने बताएका थिए ।
पूर्वप्रधानमन्त्री दाहालले संविधान निर्माण र नाकाबन्दीका बेला अफ्ठ्यारो भएको नेपाल भारत सम्बन्ध अहिले सुधार भएको बताए ।  पूर्वप्रधानमन्त्री शेरबहादुर देउवाले नेपाल अहिले व्यापार घाटामा रहेकोले यसलाई उकास्ने विषयमा छलफल केन्द्रीत गर्नुपर्ने बताए ।