रोल्पा– स्थानीय निर्वाचन खारेजी अभियानमा रहेको नेत्रविक्रम चन्द विप्लव नेतृत्वको नेपाल कम्युनिस्ट पार्टीले आफ्नो जननी मान्ने थबाङमा गाउँपालिका प्रमुखमा उम्मेदवारी दिएर निर्वाचनमा भाग लिएको खबरले तरङ्ग ल्याएको छ । दलबलसहित काङ्ग्रेससँग संयुक्त रुपमा गाउँपालिका प्रमुखदेखि वडा अध्यक्ष र सदस्यहरुमा उम्मेदवारी दर्ता गरेका आफ्ना कार्यकर्ताहरुलाई नेकपाले ‘दलाल संसदीय व्यवस्थाको पक्षपाति’ घोषणा गरेको कुराले तरङ्ग झनै थपेको छ ।
जलजला पहाड सेरोफेरोका साविकका तीन गाविसलाई मिलाएर बनाइएको जिल्लाकै सानो गाउँपालिका थबाङमा प्रमुखमा काङ्ग्रेसको सहयोगमा र पालिकाका पाँच मध्ये चार वडामा अध्यक्ष र सदस्यसम्मको स्वतन्त्र प्यानल बनाएर नेकपा स्थानीय निर्वाचनमा होमिएको छ । एउटा वडा अध्यक्षमा नेकपा र एमाले दुवैले काङ्ग्रेसलाई सघाएका छन् । उनीहरु सबैलाई नेकपाको जिल्ला कमिटीले दलाल घोषणा गरेको छ ।
थबाङ गाउँपालिकामा माओवादी केन्द्रबाट वीरबहादुर घर्ती, नेकपा–काङ्ग्रेस गठबन्धनबाट नेकपाका अमित घर्ती र एमालेका हितबहादुर रोका मैदानमा उत्रिएका छन् । उपप्रमुखमा माओवादीबाट रामकिरिणी रोका, नेकपा–काङ्ग्रेस गठबन्धनबाट श्रीकुमारी रोका र एमालेबाट जाना रोका छिन् । प्रमुखमा स्वतन्त्र उम्मेदवार दिएका भक्तबहादुर घर्तीले भने उम्मेदवारी फिर्ता लिए ।
रोचक र विशेष महत्व राख्ने कुरा त के छ भने थबाङमा माओवादी केन्द्र, काङ्ग्रेस र एमालेले आ–आफ्नो चुनाव चिन्ह अंकित टिशर्ट, टोपी लगाएर भोट मागिरहेका छन्, भने नेकपाका कार्यकर्ताहरु स्वतन्त्र उम्मेदवारीमा ‘एकीकृत जनक्रान्ति’ लेखिएको टिशर्ट लगाएर मतदातासँग भोट मागिरहेका छन् । थबाङमै महाधिवेशन गरेर एकीकृत जनक्रान्तिको राजनीतिक कार्यदिशा तय गरेको नेकपाले स्थानीय निर्वाचनमा सहभागी थबाङका आफ्ना कार्यकर्तालाई दलाल घोषणा गर्नु र पार्टीबाटै दलाल घोषणा गरिमाग्दा पनि कार्यकर्ताहरुले एकीकृत जनक्रान्ति लेखिएको टिसर्ट लगाएर भोट माग्दै हिँड्नुलाई संयोग मात्रै मान्ने कमै छन् ।
नेकपाका कार्यकर्ताले थबाङ गाउँपालिकामा स्थानीय निर्वाचनमा भाग लिएको देश विदेशमा चर्चा भइरहँदा रोल्पाको वास्तविकता यस्तो छ की, धेरै स्थानमा नेकपाका कार्यकर्ताले निर्वाचनमा भाग लिएका छन् । त्यसमा कतै काङ्ग्रेसको चिन्ह लिएर त कतै स्वतन्त्र चिन्हमा निर्वाचनमा भाग लिएको कुरा हिजो आज टोलटोलमा चर्चाको विषय बनेको छ ।
कसरी लियो नेकपाले निर्वाचनमा भाग ?
स्थानीय तहको पुनर्संरचनाको प्रारम्भिक प्रस्तावमा थबाङ केन्द्र थिएन । थबाङ जनताले सदरमुकाममा आएर धर्ना दिए, संघर्ष गरे । र, थबाङ केन्द्र हुने गरी साविकका उवा र मिरुल गाविस मिसाएर गाउँपालिका बन्यो । त्यो संघर्षमा थबाङ्गी एकढिक्का थिए । नेतृत्व नेकपाका नेता जयप्रकाश रोका ‘प्रताप’ले गरेका थिए । जयप्रकाश थबाङमा नेकपाको नेतृत्व गर्छन्, बलियो प्रभाव राख्छन् ।
आफ्नै संघर्षबाट प्राप्त थबाङ गाउँपालिकाको निर्वाचित प्रतिनिधि चयनका लागि जब निर्वाचन प्रक्रिया सुरु भयो, नेकपाका थबाङका कार्यकर्ता दोधारमा परे । आफैले संघर्ष गरेर ल्याएको गाउँपालिकाको नेतृत्वमा आफै निर्वाचित भएर नेतृत्व गर्ने वा पार्टीले लिएको खारेजीको लाईनमा उभिएर आगामी पाँच वर्षका लागि नेतृत्व गुमाएर बस्ने ।
पार्टी नेतृत्व विशेषगरी थबाङ निवासी नेकपाका पोलिट्व्यूरो सदस्य सन्तोष बुढाको स्थानीय तहको निर्वाचन खारेज गर्नुपर्ने निरन्तरको निर्देशन, निर्वाचनलाई उपयोग गरेर आफ्नो नीति कार्यक्रम लागू गर्नुपर्छ भन्ने स्थानीय कार्यकर्ता र जनताको भावनाबीच नेकपाका कार्यकर्ताहरुले एउटा मध्यमार्गी बाटो निकाले–नेकपा माओवादी केन्द्रभित्रैबाटै स्वतन्त्र उम्मेदवारी सार्ने र भोट दिएर जिताउने । त्यसो हुँदा देखिदा स्वतन्त्र उम्मेदवार देखिने, तर विजयी गराएपछि आफू अनुकुल गाउँपालिका चलाउन सकिने उनीहरुले निष्कर्ष निकाले ।
लामो समयपछि केही महिना अघि थबाङ प्रवेश गरेको काङ्ग्रेस त्यहाँ स्पेश बनाउन खोजिरहेको थियो । उसलाई पनि अनुकुल परिस्थिति यहीँ थियो । र, काङ्ग्रेसका जिल्ला सभापति अमरसिंह पुनका प्रतिनिधि र नेकपाका थबाङका नेताबीच छलफल अगाडि बढ्यो । माओवादी केन्द्रका गाउँपालिका अध्यक्ष ऋषिकेश बुढा थबाङमै थिए र उनैलाई गाउँपालिका प्रमुखमा अगाडि सर्न नेकपाले निरन्तर अनुरोध र दबाब दिन थाल्यो । उनी पनि केहीं सकारात्मक देखिए । नेकपा, काङ्ग्रेस र ऋषिकेशबीच एउटा अनौपचारिक सहमति भयो, ऋषीकेशले गाउँपालिका प्रमुखमा स्वतन्त्र उम्मेदवार दिने, नेकपाले अघोषित र काङ्ग्रेसले घोषित रुपमा उनैलाई सघाउने ।
तर, ऋषिकेशको खुट्टाको पूराना घाउ बल्झियो, उनी आफ्नो पार्टीको नेतृत्वसँग निरन्तर छलफलमा रहे । र, उपचारका लागि मनोनयन दर्ताको ४ दिनअघिमात्रै काठमाडौंको ग्राण्डी अस्पतालमा भर्ना भए । उनको खुट्टाको शल्यक्रिया भयो । शल्यक्रियाका कारण असशक्तता र पार्टी नेतृत्वसँगको छलफलपछि ऋषिकेशले स्वतन्त्र उम्मेदारी नदिने निश्चित भयो ।
यो कुरो नेकपाका नेतृत्वले उम्मेदवारी दर्ता गर्नुभन्दा दुई दिनअघिमात्रै थाहा पाए । त्यसपछि उनीहरु निकै अलमलमा परे । एउटा पक्षले थबाङको नेतृत्व गरिरहेका जयप्रकाश रोकालाई नै स्वतन्त्र उम्मेदवारी दिन प्रस्ताव ग¥यो । तर, उनले अस्वीकार गरे । सन्तोष बुढा यसैबीचमा थबाङ पुगे । उनले उम्मेदवारी दिनु पार्टीको लाईन विपरित हुने घोषणा गरिदिए । पाका नेता जयप्रकाश रोकाले पनि सन्तोषलाई नै साथ दिए । नेकपाका पाका र युवा नेताहरुबीच ध्रुवीकृत भयो –पाका बहिस्कार गर्नुपर्ने र युवा उपयोग गर्नुपर्नेमा उभिए ।
युवाहरु अमित घर्ती, अजय घर्ती, उदय घर्तीलगायत निर्वाचन उपयोग गर्नेमा अडानमा रहे । अजय थबाङका संस्थापक नेता तत्कालीन माओवादीका केन्द्रीय सल्लाहकार सहिद तेजबहादुर घर्ती ‘दीर्घ’ छोरा हुन् । उनीहरुले ऋषिकेश पछि हटेपछि आफूहरु मध्यबाटै कसैले उम्मेदवारी दिने छलफल थाले ।
४ असारमा उम्मेदवारी दर्ताको अपरान्हसम्म नेकपाबाट कसले उम्मेदवारी दिने भन्ने टुंगो लगाउन सकेनन् । निर्वाचन उपयोग गर्नुपर्ने नेकपाका युवाहरुको अडानका कारण पाकाहरु पनि युवाहरुकै लाईनमा उभिए । र, नेकपाले स्वतन्त्रबाट प्रमुख र काङ्ग्रेसले उपप्रमुखमा उम्मेदवारी दर्ता गर्ने सैद्धान्तिक सहमति त भयो । तर, काङ्ग्रेसले अडान लियो, रुख चिन्हबाट चुनाव लड्नुपर्छ । नेकपाले प्रस्ताव ग¥यो, हामी रुखबाट होइन काङ्ग्रेस पनि स्वतन्त्र चिन्हबाट लड्नुपर्छ । चिन्हको बारेमा नेकपा र काङ्ग्रेस छलफल गर्दैगर्दा उवा निवासी नेकपाका साधारण सदस्य भक्तबहादुर घर्तीले प्रमुखमा स्वतन्त्र उम्मेदवारी दर्ता गरे ।
लामो छलफलपछि नेकपा र काङ्ग्रेसबीच प्रमुखमा नेकपाका कार्यकर्ता स्वतन्त्रबाट र उपप्रमुखबाट काङ्ग्रेसको तर्फबाट रुख चिन्हबाट निर्वाचनमा लड्ने र एकले अर्कालाई सहयोग गर्ने सहमति भयो । नेकपाले स्थानीय युवा अमित घर्तीलाई स्वतन्त्र उम्मेदवार घोषणा ग¥यो । काङ्ग्रेसले उपप्रमुखमा उवाकी श्रीकुमारी रोकालाई घोषणा गरिसकेकोले सहमतिपछि नेकपा र काङ्ग्रेसका कार्यकर्ता समर्थकहरु संयुक्त रुपमा निर्वाचन अधिकृतको कार्यालयमा गएर उम्मेदवारी दर्ता गरे । र, थबाङमा नेकपा र काङ्ग्रेसको गठबन्धन बन्यो । अन्तिमसम्म निर्वाचन बहिस्कारको पक्षमा रहेका नेता सन्तोष बुढा त उम्मेदवारी दर्ताको ¥यालीमा देखिएनन्, तर जयप्रकाश रोका भने सक्रिय रुपमा लागे ।
वडामा पनि नेकपाका उम्मेदवार
नेकपाले गाउँपालिका प्रमुखमा काङ्ग्रेसको सहयोगमा स्वतन्त्र उम्मेदवार दर्ता गरे पनि वडामा भने एक्लो प्यानल खडा गरेको छ । साविक थबाङ गाविसमा पर्ने वडा नं. १ मा फर्कबहादुर बुढामगर, २ मा लिलाराम रोकामगर, साविक उवा गाविसमा पर्ने ४ नं. वडामा हिम्मत घर्तीमगर र ५ नं. वडामा ढुकमान रोकामगरले अध्यक्षको उम्मेदवारी दिएका छन् । वडा नं. १ मा काङ्ग्रेसको सहयोग लिएको नेकपाले वडा नं. ३ मिरुलको अध्यक्षमा काङ्ग्रेसलाई सहयोग गरेको छ ।
निर्वाचनमा सहभागी हुनुको ६ कारण
१) पाकाहरुमाथि युवाहरुको जीत
थबाङमा नेकपाका पाका नेताहरु अन्तिसम्म निर्वाचन बहिस्कारको पक्षमा थिए । तर युवाहरु निर्वाचन उपयोग गर्दामात्रै थबाङ र थबाङ्गीको भलो हुने निष्कर्षका साथ अडानबाट तल झरेनन् । अमित घर्ती, अजय घर्ती, उदय घर्तीलगायत युवाहरुलाई सन्तोष बुढा, जयप्रकाश रोकाहरुले निर्वाचनमा सहभागीता पार्टी लाईन विपरित हुने भन्दै निरन्तर सम्झाए, तर युवाहरु कन्भिन्स भएनन् । बरु आफ्नो निर्णय लागू गर्दै निर्वाचनमा सहभागी हुने निर्णय गराए । पाकाहरुमाथि युवाहरु विजयी हुनुले नै थबाङमा नेकपा निर्वाचनमा सहभागी भएको हो ।
२) स्वामित्व ग्रहण
नेकपा नेतृत्वमा भएको संघर्षबाट नै थबाङ गाउँपालिका बनेको हो । थबाङ केन्द्र हुने गरी अलग्गै गाउँपालिकाका लागि थबाङमा रहेका नेकपा र माओवादी केन्द्रका कार्यकर्ताहरुले लिबाङ पुगेर संयुक्त आन्दोलन गरे । र, सफल भयो । आफैले संघर्ष गरेर बनेको गाउँपालिका प्रमुखमा आफै निर्वाचित भएर नीति कार्यक्रम लागू गर्ने र स्वामित्व ग्रहण गर्नका लागि नेकपाले उम्मेदवारी दिएको हुन सक्छ ।
३) स्थानीय जनताको निर्वाचन चाहना
निर्वाचन बहिस्कार वा एक छापे मतदान थबाङको चिनारी बनेको छ । तर, निर्वाचन बहिस्कार गर्दा मूलधारबाट पछि पर्ने र राजनीतिक, आर्थिक, सामाजिक अधिकार र पहुँचबाट बाहिर पर्ने थबाङका युवा जमातको नयाँ निष्कर्ष छ । जनता पनि त्यहीं चाहान्छन् । निर्वाचनमा सहभागी हुने र आफ्नो मतको प्रयोग गर्न पाउनुपर्ने जनचाहानाले पनि नेकपा निर्वाचनमा सहभागी भएको हुन सक्छ ।
४) यो संसदीय चुनाव होइन
थबाङका नेकपाका कार्यकर्ताहरुको पछिल्लो निष्कर्ष हो, स्थानीय तहको निर्वाचन संसदीय निर्वाचन होइन । यो स्थानीय जनप्रतिनिधि चुनेर आफ्नो शासन आफै गर्ने निर्वाचन हो । संसदवाद र संसदीय निर्वाचनको बहिस्कार गर्ने, तर स्थानीय तह संसदीय नभएकोले उपयोग गर्नुपर्ने निष्कर्षले पनि ऊ निर्वाचनमा सहभागी भएको हुनुपर्छ ।
५) माओवादीको प्रभाव रोक्न
केही महिना अगाडि माओवादी केन्द्र रोल्पाले पार्टी सदस्यता वितरण र नवीकरण अभियान चलायो । त्यसमा थबाङका माओवादी कार्यकर्तालाई त्यहाँ २५० जना सदस्य बनाउनुपर्ने कोटा दियो । जिल्ला पार्टीको बैठकमा कतिपय नेताहरुलाई लाग्यो ‘थबाङमा कसरी २५० सदस्य पुग्छन् ?’ तर तीन महिनापछि थबाङका माओवादी केन्द्रका नेताहरु जिल्ला पार्टी कार्यालयमा ४२० जनाले सदस्यता भरेको विवरण पेश गरे । यसबाट थबाङमा माओवादी केन्द्रका प्रभाव बढ्दै गएको देखिन्छ । खासगरी त्यहाँका शिक्षक, बुद्धिजिवि, व्यसायी र युवाहरुमार्फत माओवादी केन्द्रले आफ्नो संगठन विस्तार गर्दै लगेको छ ।
स्थानीय तहको निर्वाचनमा माओवादी केन्द्र खुलेरै लाग्यो । निर्वाचनअघि माओवादीले थबाङमा चालेको निर्वाचन गतिविधि माओवादी स्वयम्को अपेक्षाभन्दा बढी त थियो नै नेकपाले नसोचेकै थियो । त्यहीं गतिमा जाँदा निर्वाचनमा थबाङ्गी जनता सहभागी हुने र नेकपाको उम्मेदवार नहुँदा जनताले माओवादी केन्द्रलाई विकल्पको रुपमा लिनसक्ने सम्भावना बढ्यो । त्यसो हुँदा माओवादी केन्द्रको प्रभाव झनै बढ्ने निष्कर्षमा नेकपा पुग्यो । र, माओवादी प्रभाव रोक्न आफ्नो उम्मेदवार उठाउने र आफ्नो भोट सुरक्षित गर्ने निष्कर्षका साथ नेकपा निर्वाचनमा सहभागी भएको हुन सक्छ ।
६) माओवादी केन्द्र अस्वीकार
थबाङमा नेकपाको मुख्य प्रतिस्पर्धी माओवादी केन्द्र नै हो । थबाङ गाउँपालिकामा रहेको साविकका उवा र मिरुल गाविसमा नेकपाको प्रभाव कम छ । त्यहाँ काङ्ग्रेस र एमाले भन्दा माओवादी केन्द्र बलियो देखिन्छ । उवा र मिरुलमा बहुमतका साथ आउने र थबाङको मत खस्दा केही मत ल्याउँदा वा पूरै बहिस्कार हुँदा माओवादी केन्द्रले जित्न सक्ने सम्भावना पनि छ । मैदान खाली गरिदिएर जित्न दिनुभन्दा निर्वाचनमा भाग लिएर अस्वीकार गर्नु सहि हुने नेकपाको निष्कर्ष हुनसक्छ ।
७) आफैले जित्ने विश्वास
नेकपालाई काङ्ग्रेसले प्रमुखमा सघाएको छ । थबाङको वडा नं. १ मा काङ्ग्रेसका अध्यक्षका उम्मेदवार कमल रोकाले उम्मेदवारी फिर्ता लिएर नेकपाका तर्फबाट स्वतन्त्र उम्मेदवारलाई समर्थन गरेका छन् । उता ३ नं. वडा साविक मिरुल गाविसमा एमालेका अध्यक्षका उम्मेदवार सतबहादुर बुढाले उम्मेदवारी फिर्ता लिएर काङ्ग्रेसलाई सघाउने भएका छन् । यसरी विस्तारै नेकपा, काङ्ग्रेस र एमालेको गठबन्धन नजिकिदै छ । माओवादी केन्द्र एक्लो प्रतिस्पर्धामा छ । प्रमुखमा उम्मेदवार अमित घर्ती थबाङबासी हुँदा थबाङको अधिकांश भोट पाउने, काङ्ग्रेसको सबै भोट पाउने, एमालेले पनि सहयोग गर्ने हुँदा जित्न सकिने निष्कर्षले पनि नेकपाले उम्मेदवार उठाएको हुन सक्छ ।
किन दलाल घोषणा ?
नेकपाले थबाङ गाउँपालिकामा प्रमुख र चारवटा वडामा अध्यक्ष र सदस्यसहितको स्वतन्त्र प्यानल दर्ता गरेपछि यसको चर्चा देशभर भयो । देशभर निर्वाचन विथोल्न सक्रिय, सक्रिय हुँदा जेलनेल भोगेका कार्यकर्ताको चासो थबाङतिर केन्द्रित हुन स्वभाविक हो । ‘देशभर निर्वाचन विथोल्न खोज्ने, तर आफ्नो जननी भूमि मानिएकोमा निर्वाचनमा भाग लिंदा राजनीतिक रुपमा नेकपा र उसको नेतृत्व विचलित भएको प्रमाणित भयो । र, उसको नेतृत्वले नेकपा रोल्पाको नेतृत्वलाई निरन्तर दबाब दियो ।’ विप्लव पार्टीका केही स्थानीय नेताको बुझाई छ ।
त्यसपछि रोल्पाका सेक्रेटरी दलबहादुर खत्री ‘जागृती’ले वक्तव्य निकालेर त्यहाँ निर्वाचनमा भाग लिने आफ्नै कार्यकर्तालाई ‘दलाल संसदीय व्यवस्थाको पक्षपाति’ घोषणा गरे ।
उनले वक्तव्यमा यस्तो लेखेका छन्,
‘हाम्रो गौरवशाली पार्टी नेपाल कम्युनिस्ट पार्टी यतिबेला दलाल संसदीय व्यवस्थाद्वारा नेपाली जनताविरुद्ध जबरजस्ती थोपारिएको चुनावी अभियानका विरुद्ध विभिन्न संघर्षमार्फत चुनाव खारेजीको अभियानमा लागिरहेको छ । भारतीय साम्राज्यवादको नांगो दलाली गरिरहेको वर्तमान देउवा प्रचण्ड मण्डली सरकार यतिबेला नेपाली जनताविरुद्ध दमन अभियान पनि सञ्चालन गरिरहेको छ ।
हाल दोस्रो चरणको चुनावी नाटक मञ्चन भइरहेको सन्दर्भमा आज थबाङमा हाम्रो पार्टीको तर्फबाट उम्मदोवर मनोनन भनेर भ्रम पूर्ण समाचारहरु आईरहेकोप्रति हाम्रो पार्टीको गम्भीर ध्यानाकर्षण भएको छ । हाम्रो पार्टीको तर्फबाट उम्मेदवार भनेका व्यक्तिहरु हाम्रो पार्टीको नभई दलाल संसदीय व्यवस्थापका भ्रम जालमा परेका व्यक्तिहरु हुन् । त्यसैले ती व्यक्तिहरुको नाम जोडेर नेपाल कम्युनिस्ट पार्टीका उम्मेदवार भन्नु नेपाली जनतालाई भ्रम जालमा पार्ने कुरा मात्रै हो । दलाल संसदीय व्यवस्थाको चुनावी भ्रम जालमा नपरी चुनाव खारेजीको अभियानमा डट्न यसै विज्ञप्तीमार्फत तबाङगी जनसमुदाय र आम रोल्पाली जनसमुदायमा हार्दिक अपील गर्दछौँ ।’
दलाल घोषणा ग¥यो, कारबाही गरेन
नेकपाले थबाङमात्रै होइन जिल्लाभर निर्वाचनमा भाग लिने आफ्ना कार्यकर्ताहरुलाई दलाल संसदीय व्यवस्थाको भ्रममा परेको घोषणा ग¥यो, तर अझैसम्म कारबाही गरेको घोषणा गरेको छैन । तर, उसलाई थबाङका आफ्ना कार्यकर्तालाई कारबाही गर्न सक्ने अवस्था पनि देखिदैन । अन्ततः अनेकन आशंकाकाबीच थबाङ निर्वाचनमय भएको छ ।
र, यी ठाउँमा पनि नेकपाका उम्मेदवार
थबाङमा बलियो स्वतन्त्र उम्मेदवार उठाएको नेकपाले जिल्लाका अन्य तहमा पनि उम्मेदवार उठाएको छ । माडी गाउँपालिकाको वडा नं. ५ साविक भाबाङ गाविसमा नेकपाबाट अध्यक्ष, काङ्ग्रेस र एमालेबाट सदस्य गरी उम्मेदवार दर्ता गरेको छ । नेकपाका कार्यकर्ता विष्णुकुमार घर्तीले अध्यक्षमा उम्मेदवादि दिएका छन् । तर, रोचक त्यहाँ रोचक के छ भने नेकपा र एमालेका कार्यकर्ता पनि काङ्ग्रेसको रुख चिन्ह लिएर निर्वाचनमा होमिएका छन् । भाबाङ नेकपाका राप्ती व्यूरो ईन्चार्ज केशबहादुर बाँठाको गाउँ हो ।
उता सुकीदह गाउँपालिकामा काङ्ग्रेस र नेकपाबीच तालमेल भएको छ । त्यहाँ काङ्ग्रेसका हरी पुन अध्यक्ष र नेकपाका अमृताकुमारी वली उपप्रमुखमा उम्मेदवारी दिएका छन् । उनी नेकपा निकट शिक्षक संगठनको जिल्ला नेता नेत्र वलीकी पत्नी हुन् । उपप्रमुखमा त्यहाँ नेकपाकी वलीले काङ्ग्रेसको चिन्ह लिएर निर्वाचनमा होमिएका छन् । ती महिला जिनाबाङकी हुन् र जिनाबाङ नेकपाका केन्द्रीय सदस्य चुडामणी ओलीको गाउँ हो ।
सुनछहरी गाउँपालिकाको फगामको वडामा नेकपाका हस्तबहादुर बुढाले अध्यक्षमा स्वतन्त्र उम्मेदवारी दिएका छन् । त्यहाँ पनि नेकपाका कार्यकर्ताहरुले वडामा स्वतन्त्र प्यानल बनाएर निर्वाचनमा होमिएका छन् । उता सुवर्णावती गाउँपालिकाको खुंग्रीमा नेकपाका कार्यकर्ता दिपेन थापाको प्रस्तावमा गेहराज घर्तीले वडा अध्यक्षमा उम्मेदवारी दिएका छन् ।
माओवादी केन्द्र परित्याग गरेका कुलानन्द गिरीले त्रिवेणी गाउँपालिकामा मालेको चुनाव चिन्ह लिएर प्रमुखको उम्मेदवारी दिएका छन् । त्यहाँ उनलाई नेकपाले पूर्ण सहयोग गर्ने भएको छ ।
सकारात्मक सन्देश
विप्लव नेतृत्वको नेता कार्यकर्ताहरु घोषित रुपमा पार्टीकोतर्फबाट निर्वाचनमा नहोमिए पनि कतै स्वतन्त्र रुपमा, कतै काङ्ग्रेसको चिन्हमा त कतै भिन्न तरिकाले निर्वाचनमा सहभागी भएपछि निर्वाचन वातावरणका लागि सकारात्मक सन्देश गएको छ ।
हुन सक्छ, यस्तो पनि
रोल्पा माओवादी जनयुद्धको आधार क्षेत्र । जहाँबाट धेरै नेता केन्द्रमा छन् माओवादीका तर्फबाट । बेला–बेलामा हुने माओवादीभित्रको विभाजनको पनि रोल्पामा असर पर्यो । यसकारण नेताहरुबीचको व्यक्तिगत लडाईं पनि यो चुनावमा सहतमा आउँदैछ ।
आफ्नो राम्रो क्षेत्र मानिएको गोरखामा नयाँ शक्तिका कारण चुनाव हारिएको हिसाव निकालेको माअोवादी केन्द्र रोल्पमा विप्लवका कारण चुनाव हारिन्छ कि भन्ने भयमा छ । उपसभामुख ओनसरी घर्ती, उपप्रधान तथा परराष्ट्रमन्त्री कृष्णबहादुर महरा, पूर्वअर्थमन्त्री बर्षमान पुन, प्रचण्डका स्वकीय सचिव जोखबहादुर महरा, कुलप्रसाद केसी, जयपुरी घर्ती, झक्कु सुवेदी र दीपेन्द्र पुनजस्ता नेताहरु रोल्पाकै हुन् ।
आफ्नो भावी राजनीतिका लागि माओवादी केन्द्रलाई ‘डाउन साइज’ नगरी सम्भव हुँदैन भन्ने रोल्पाली नेता विप्लवले बुझेका हुन सक्छन । यहीँ कारण विप्लवले रोल्पामा नयाँ प्रयोग गरेका हुन सक्छन् । स्वतन्त्र रुपमै भएपनि रोल्पामा विप्लवको चुनावी सहभागिता माओवादी केन्द्रका लागि चुनौति हुन सक्छ । यहीँ कारण अहिले रोल्पामा माओवादी केन्द्रका आधा दर्जन भन्दा बढी केन्द्रीय नेता चुनावी अभियानमा खटेका छन् ।
माओवादी केन्द्रलाई दवाव के छ भने रोल्पामा चुनाव हारियो भने त्यसको दीर्धकालीन सन्देश जान्छ कि माओवादीको आधारभूमि भत्कियो । माओवादी केन्द्रसँग मुद्दासँगै ‘इगो’ को राजनीति गरिरहेका विप्लवले रोल्पामा आफुले जितेर भन्दा पनि माओवादीलाई हराएर आफ्नो रोल्पाको राजनीतिको बाटोको ‘ट्र्याक’ खोल्न सक्छन् । पहिलो चरणको चुनावमा जाजरकोट लगायतका जिल्लामा यस्तो प्रयोग भैसकेको छ, जुन रिपोर्ट माओवादी केन्द्रको हेडक्वाटरमा पनि आएको छ ।
दोस्रो संविधानसभा चुनावमा रोल्पामा विप्लव ठूला खेलाडी थिए । कृष्णबहादुर महराले विप्लवसँग आत्मसर्मपण गरे । अन्तितमा विप्लवको सहयोगमा महराले चुनाव जिते । यसपाली स्थानीय चुनाव हो ‘आत्मसर्मपण’ तिर राजनीति नजान सक्छ । तर, अहिले विप्लवको प्रयोग सफल भयो भने आगामी संसदीय चुनाव लड्ने तयारी गरिरहेका बर्षमान पुनका लागि चुनौति हुन सक्छ । फेरि विप्लव र पुनको सम्बन्ध समुधर छैन् । महरा र विप्लवको गुरु–चेलाको सम्बन्ध हो, विप्लव र पुनको शक्ति संघर्षमा एक अर्कालाई निषेध गर्ने ।
सतहमा रोल्पको स्थानीय चुनाव देखिएपनि अन्तिममा यो लडाई प्रचण्ड र विप्लवकै हो ।
३ जेठ २०८१। नेपाली प्रजातान्त्रिक आन्दोलनमा कोरिएको एउटा सशक्त हस्ताक्षर हो, मदन भण्डारी । निकै
वैशाख ३०, काठमाडौं। नेकपा (एमाले)ले मधेश सरकारलाई दिएको समर्थन फिर्ता लिएको छ। आइतबार मधेश प्रदेशको
तुलसीपुर (दाङ), चैत २२ गते । लुम्बिनी प्रदेश सरकारका मुख्यमन्त्री डिल्लीबहादुर चौधरीले आज विश्वासको मत लिनुहुने
चैत ७,काठमाडौँ। सर्वोच्च अदालत परिसरबाट सोमबार अत्याधुनिक हतियारसहित पक्राउ परेका दुई जनालाई पाँच दिन हिरासतमा राख्न
फागुन २९,काठमाडौं । । मङ्गलबार बिहान प्रधानमन्त्री निवास बालुवाटारमा बसेको सत्तारुढ गठबन्धनको बैठकमा नेकपा (माओवादी
फागुन २६, काठमाडौं। सत्तारुढ प्रमुख घटक नेकपा (एमाले) का वरिष्ठ उपाध्यक्ष ईश्वर पोखरेलले नयाँ सत्ता
