श्रावणको मासिक राशिफल ,२०७४

श्रावण महिनामा सूर्यले कर्कट राशिमा भ्रमण गर्दछन् । अन्य ग्रहहरूमध्ये सुरुमा कर्कट राशिमा रहेको बुध ग्रह ०६ गते दिउँसो सिंह राशिमा प्रवेश गरी पूरै महिना सिंह राशिमा नै रहे पनि २१ गतेपछि बुधको गतिमा बक्रता आउने सङ्केत छ । त्यस्तै मङ्गल ग्रह यो महिनाको पूरै अवधि कर्कट राशिमा नै रहने देखिन्छ, अनि बृहस्पति ग्रह पनि महिनाभरि कन्या राशिमा नै रहने छ ।

rashifal-Horoscope-Astrology-Venus-retrograde-Margie-news-in-hindi-108089

त्यस्तै बक्री अवस्थामा रहेको शनिश्चर ग्रहले पूरै महिना बृश्चिक राशिमा उपस्थिति जनाउने छ । उता बृष राशिमा विचरणशील शुक्र ग्रह १० गतेपछि मिथुन राशिमा पुग्ने देखिन्छ । राहु र केतु ग्रहले आगामी १९ महिनाका लागि राशि परिवर्तन गर्दैछन् । सुरूमा क्रमशः सिंह र कुम्भ राशिमा रहेका राहु र केतु २१ गतेपछि क्रमशः कर्कट र मकर राशिमा विचरण गर्नेछन् । समग्र ग्रहगोचरको मूल्याङ्कन गर्दा मिथुन लग्नमा सङ्क्रान्ति परेको तथा लग्नेश बुध ग्रह भएकाले सकारात्मक र सामान्य झैं लागे पनि आइतबार परेको सङ्क्रान्तिका कारण केही अशुभ फल प्राप्त हुने भएकाले यो महिना मिश्रित प्रभावकारी रहने सङ्केत छ । जनतामा निराशा र कष्ट हुनेछ, महामारी र रोगव्याधिको प्रकोप बढ्न सक्छ ।

लडाइँ, झगडा र द्वन्द्वको सम्भावना देखिन्छ । आपराधिक घटनाको बिगबिगी हुनेछ । खाद्यपदार्थको अभाव हुनाले दुर्गम क्षेत्रमा भोकमरीको सम्भावना हुन्छ । निरन्तर वर्षा हुनाले बाढीपैह्रोका कारण धनजनको क्षति हुनेछ । सरुवा रोग बढ्ने छ भने सवारी दुर्घटनाको प्रकोप पनि उत्तिकै छ । राजनैतिक वृत्तमा सामान्य रहे पनि महिनाको अन्त्यतिर सरकारले अप्रिय काम गर्नसक्ने भएकाले दलहरूका बीचमा खिचातानी बढ्न सक्छ । वित्तीय क्षेत्र सन्तोषजनक रहने छ ।

२०७४ श्रावण महिनाको मासिक राशिफल

मेष (चु, चे, चो, ला, लि, लु, ले, लो, अ) –
श्रावण महिनामा तपाईंको राशिबाट चौथो भावमा सूर्यले प्रवेश गर्नेछन् । बुध ग्रह र राशिस्वामी मङ्गल पनि साथैमा रहेकाले यस अवधिमा कडा मिहिनेत र परिश्रम गर्ने योग छ । निरन्तर गरिएको कष्टप्रद परिश्रमका कारण छिटै थाकिन्छ । मन कुकर्म र गलत आचरणतर्फ आकर्षित बन्न सक्छ । मातापिता र अभिभावक वर्गको स्वास्थ्यस्थिति चिन्ताको विषय बन्नेछ । मानसिक उल्झन र तनावबाट ग्रसित रहनु पर्नेेछ । कुनै गुप्त कारोबार वा गतिविधिका क्रममा हानि ब्यहोर्नु पर्ने हुन्छ । आकस्मिक धनहानिको सङ्केत पनि छ । उता छैटौं भावमा रहेको भाग्येश बृहस्पतिले पनि सकारात्मक फल प्रदान गर्न कन्जुस्याइँ गरेको हुँदा समग्रमा राम्रो महिना देखिंदैन । थोरै लाभका लागि समेत धेरै मिहिनेत गर्नुपर्ने हुन्छ । स्वास्थ्य सम्बन्धी विविध समस्याले दिक्क लगाउने छ । परिजनसितको सम्बन्ध पनि राम्रो हुनेछैन । खास गरी यस महिनाको ०१, ०८, ०९, १०, १७, १८, १९, २७ र २८ गते तपाईंले अत्यधिक सचेत रहनु राम्रो हुन्छ ।

बृष (इ, उ, ए, ओ, बा, बि, बु, बे, बो) –
तृतीय भावमा सूर्य, मङ्गल र बुध रहेको तथा आफ्नै राशिमा राशिस्वामी शुक्रको उपस्थिति भएकाले तपाईंका लागि सकारात्मक समय सुरु भएको छ । पारिवारिक जीवन सुखद रहनेछ । बहुप्रतीक्षित इच्छा, आकाङ्क्षा र उद्देश्य सफल हुनसक्छन् । अधिकतम समय घुमघाम र भ्रमणमा बित्नेछ, साथै ससाना यात्रा फलदायी र भाग्यशाली सिद्ध हुनेछन् । आकस्मिक रूपमा धनप्राप्तिको सम्भावना छ । मनमा उत्साह र साहसी प्रवृत्ति देखा पर्नेछ । विदेशबाट राम्रो समाचार प्राप्त हुनेछ । लग्नमा रहेको राशिस्वामीको प्रभावले सुखपूर्ण र आनन्दपूर्वक समय व्यतीत हुनेछ । दाम्पत्यसुख बढ्ने छ, साथीभाइ र मित्रवर्गले पनि साथ दिनेछन् । दाम्पत्य जीवनको भरपूर सुख भोग गर्न पाइने छ । ललितकला, सङ्गीत एवं साहित्यमा रूचि जाग्ने छ । भाग्येश शनि बक्री रहेकाले सानातिना रोगले अस्वस्थ तुल्याउन सक्छ, सचेत हुनुपर्छ । विशेषतः यस महिनाको ०२, ०३, १०, ११, १२, १९, २०, २१, २९, ३० र ३१ गते तपाईंका लागि अशुभ रहने छन् ।

मिथुन (का, कि, कु, घ, ङ, छ, के, को, ह) –
धनस्थानमा सूर्य र मङ्गलको उपस्थिति सकारात्मक होइन । अवाञ्छित व्यक्तिहरूउपर निर्भर रहनु पर्ने बाध्यता हुनसक्छ । शारीरिक तनाव र बोझलाई झेल्नसक्ने सामथ्र्य हुँदाहुँदै पनि पारिवारिक झैझमेला र समस्या बढ्नाले मन विचलित हुनसक्छ । आर्थिक दृष्टिले लाभदायी समय रहनेछैन, कुनै ठूलो सम्पत्तिको नोक्सानी हुनसक्छ, दीर्घकालिक लगानी र कारोबारप्रति सचेतता अपनाउनु आवश्यक छ, । स्वास्थ्यतर्फ आँखा र मुखको क्षेत्र कमजोर हुन्छ । घरपरिवारकै सदस्यका बीचमा मनोमालिन्य बढ्नाले तनाव बढ्नसक्छ । तर अत्तालिई हाल्ने परिस्थिति पनि छैन, दोस्रो भावमा नै राशिस्वामी बुधको उपस्थिति भएकाले व्यावसायिक कारोबारबाट लाभ मिल्नेछ । परिस्थितिलाई मनन गर्नसक्ने क्षमताको विकास हुनाले जोसुकैलाई पनि आफ्नो विचार र लक्ष्यप्रति सहमत तुल्याउन सकिने छ । सामाजिक प्रसिद्धि प्राप्त हुनेछ । तर २१ गतेपछि बुध बक्री हुने हुँदा सचेतता अपनाएको राम्रो हो । सामान्यतया यस महिनाको ०४, ०५, १२, १३, १४, २२, २३, २४, ३१ र ३२ गते तपाईंका लागि अशुभ रहने छन् ।

कर्कट (हि, हु, हे, हो, डा, डि, डु, डे, डो) –
आफ्नै राशिमा सूर्यको आगमन भएकाले यस अवधिमा धनसम्पत्ति र सुखसुविधा आर्जन गर्ने पक्षमा आकर्षित रहनु हुनेछ । आवश्यकताभन्दा बढी आत्मविश्वासको सिर्जना हुनेछ । सार्वजनिक क्षेत्र अथवा सरकारको कुनै महत्त्वपूर्ण जिम्मेबारी प्राप्त हुनसक्छ । छोटो दूरीको यात्रा हुने सम्भावना छ, जुन सुझबुझ र लगनशीलताका कारण फलदायक सिद्ध हुनेछ । सामाजिक सङ्घसंस्था वा परोपकारका क्षेत्रमा सहयोग गर्नु पर्नेछ । त्यस्तै पञ्चमेश मङ्गल पनि राशिमा नै छ, अतः यसको प्रभावले मिश्रित परिणाम प्राप्त हुनेछ । इच्छाविपरीत परिणाम आउनसक्छ, त्यसैले फलप्राप्ति प्रति धेरै उत्साह नदेखाउनु उचित हुनेछ । भाग्येश बृहस्पति तृतीय भावमा रहेकाले सामाजिक सम्मान प्राप्त हुनेछ । वैवाहिक जीवन वा प्रेमप्रसङ्ग सुखद हुनेछ । तर पाँचौं भावमा रहेको बक्री शनिले गलत विचार वा कार्यमा संलग्न हनुपर्ने बाध्यता आउन सक्छ, सचेत हुनुपर्छ । सामान्यतया यस महिनाको ०६, ०७, १५, १६, १७, २४, २५ र २६ गते तपाईंका लागि अशुभ रहने छन् ।

सिंह (मा, मि, मु, मे, मो, टा, टि, टु, टे) –
राशिस्वामी सूर्यका साथमा राज्येश बुध र भाग्येश मङ्गल बाह्रौं भावमा रहनु तपाईंका लागि नकारात्मक पक्ष हो । यतिवेला क्षणिक आवेग र उन्मादलाई नियन्त्रण गर्नु बेस हुनेछ । गलत निर्णयका कारण अकल्पनीय हानि हुनसक्छ, त्यसैले कुनै निर्णय लिनुपूर्व राम्रो सोचविचार गर्नु आवश्यक छ । खर्चको मात्रा बढ्ने छ । व्यवसायिक स्थितिमा गिरावट आउनसक्छ । व्यक्तिगत स्वास्थ्य पनि अनुकूल हुनेछैन । नातागोताका सदस्य एवं मित्रवर्गसँग सुमधुर सम्बन्ध कायम राख्नु आवश्यक छ, अन्यथा एकआपसमा तनाव उत्पन्न हुनसक्छ । जुवातास, लटरी र सट्टापट्टातर्फ नहौसिनु ठिक हुनेछ । दीर्घ रोगको प्रकोपमा रहेका व्यक्तिले पूर्ण रूपमा परहेजमा बस्नु राम्रो हुनेछ । स्वाभिमान र घमण्डका कारण केही समस्याहरू सिर्जना हुनसक्छन् । पञ्चमेश बृहस्पति दोस्रो भावमा रहेकाले केही सकारात्मक फल मिल्नेछन्, तर यो महिनाको अधिकतम समय राम्रो रहने छैन । खास गरी यस महिनाको ०१, ०८, ०९, १०, १७, १८, १९, २७ र २८ गते तपाईंले अत्यधिक सचेत रहनु राम्रो हुन्छ ।

कन्या (टो, प, पि, पु, ष, ण, ठ, पे, पो) –
राशिस्वामी बुधका साथमा मङ्गल र सूर्य ग्रह राज्यस्थानमा विचरणशील रहेकाले यो महिना इच्छा र आकाङ्क्षा पूर्ण हुने समयका रूपमा यस अवधिमा आएको छ । नातागोताका सदस्यहरूबाट सहायता मिल्नेछ । यस समयमा गरिएका किनमेल र कारोबारहरू सफल हुनेछन् । करार र सम्झौताबाट लाभ मिल्नेछ । दाम्पत्य जीवन, घरायसी सुख, प्रेमसम्बन्ध र प्रणयप्रसङ्गका लागि पनि श्रेष्ठ समय हो । आय आर्जनका मार्गमा सुधार आउने छ । लामो यात्रा सुखद र सफल हुनेछ । विलासिताका सामग्री र अन्य वस्तुहरू खरिद गर्नाले खर्च बढ्न सक्छ, तर घरायसी र पारिवारिक वातावरण सुखद हुनेछ । प्रणय सम्बन्धका निमित्त राम्रो समय छ । प्रतिष्ठित व्यक्तिहरूसित मित्रतापूर्ण सम्बन्ध कायम हुनेछ । तर पञ्चमेश शनि बक्रताका साथमा तृतीय भावमा रहेकाले व्यक्तिगत स्वास्थ्यप्रति सचेतता अपनाएको राम्रो हुनेछ । सामान्यतया यस महिनाको ०२, ०३, १०, ११, १२, १९, २०, २१, २९, ३० र ३१ गते तपाईंका लागि अशुभ रहने छन् ।

तुला (र, रि, रु, रे, रो, ता, ति, तु, ते) –
अत्यन्त क्रियाशील र व्यस्त रहने र कर्मक्षेत्रको परीक्षणको समय हो । दसौं भावमा सूर्यको प्रवेश भएकाले यस समयमा व्यापार र नोकरीका माध्यमबाट लाभ मिल्नेछ । हाकिम, मातापिता र वरिष्ठ व्यक्तित्वको सहानुभूति र आशीर्वाद मिल्नेछ । व्यवसायिक÷व्यापारिक दृष्टिले फलदायी यात्राको सम्भावना छ । यस अवधिलाई सन्तोषजनक समयका रूपमा लिन सकिन्छ । अधिकतम आर्थिक समस्याहरू हल हुनसक्छन् । द्वितीयेश मङ्गल पनि कर्मस्थानमा नै रहेकाले विपरीत परिस्थितिलार्ई कुशलतापूर्वक झेल्नाले आत्मविश्वास बढ्नेछ । शत्रुले हानि पुर्याउन सक्दैनन् । भाग्येश बुधको प्रभाव पनि राम्रै देखिन्छ, वाहनादि र विदेशबाट लाभ प्राप्त हुनेछ । घरमा कुनै शुभ कृत्यको आयोजना हुनसक्छ । उता राशिस्वामी शुक्र अष्टम भावमा स्वगृही भएर बसेकाले अचानक धनलाभ हुने सम्भावना छ, तर खर्चको मात्रामा पनि बृद्धि हुनेछ । महत्त्वपूर्ण काम गोपनीय ढंगले गरेको जाति हुन्छ । यस महिनाको ०४, ०५, १२, १३, १४, २२, २३, २४, ३१ र ३२ गते तपाईंका लागि अशुभ रहने छन् ।

बृश्चिक (तो, ना, नि, नु, ने, नो, या, यि, यु) –
राशिस्वामीका साथमा भाग्यस्थानमा सूर्य र बुध ग्रह बसेकाले यस महिनामा राम्रा प्रतिफलहरू प्राप्त हुनेछन् । घरपरिवारका बृद्ध सदस्यबाट सहयोग र आशीर्वचन मिल्नेछ । दूरदराज वा दुर्गम स्थानमा गरिएको यात्रा सफल हुनेछ । आम्दानीका मार्ग बढ्ने छन् र आयका नयाँनयाँ स्रोतहरू प्राप्त हुनेछन् । चिट्ठा, लटरी वा सट्टापट्टाबाट पनि आय हुने सम्भावना छ । प्रसिद्ध व्यक्तिहरू सम्पर्कमा आउने छन् । ख्याति, प्रतिष्ठा र सम्मानमा बढोत्तरी हुनेछ । बुद्धिलाई उपयोग गर्नाले लाभ लिन सकिने छ । व्यवसाय वा पेसामा राम्रो उपलब्धी हासिल हुनेछ । यात्राबाट निश्चित लाभ प्राप्त हुनेछ । उता राज्यस्थानमा रहेको पञ्चमेश बृहस्पतिको प्रभावले दाजुभाइ र दिदीबहिनीका माझमा खुसीको वातावरण बन्नेछ । प्रतिस्पर्धा वा परीक्षामा सहभागी हुँदा सफलता आर्जन हुनेछ । आध्यात्मिक र दार्शनिक क्रियाकलापमा मन आकर्षित हुनसक्छ । सामान्यतया यस महिनाको ०६, ०७, १५, १६, १७, २४, २५, २६,  गते तपाईंका लागि अशुभ रहने छन् ।

धनु (ये, यो, भ, भि, भु, ध, फा, ढ, भे) –
अष्टम भावमा रहेका सूर्य र पञ्चमेश मङ्गलको प्रभावले अचानक विविध समस्या देखा पर्न सक्छन् । पारिवारिक र नातागोताभित्रका सदस्यहरूसँग राम्रो व्यवहार पुर्याउन नसक्नाले विनाकारण झगडा र विवाद हुनेछ । लामो समयसम्म अस्वस्थ हुने आशङ्का छ, त्यसैले खानपान, आहारविहार र स्वास्थ्यप्रति सचेत रहनु बेस हुनेछ । शङ्कास्पद कारोबार र क्रियाकलाप सहभागी नबन्नु राम्रो हुनेछ, त्यस्तै खराब र अनैतिक मानिने कामभन्दा टाढा रहनु नै कल्याणकारी हुनेछ । महत्त्वपूर्ण कागजातमा हस्ताक्षर गर्नुअघि राम्ररी पढ्नु बेस होला । जुवातास, लटरी र सट्टापट्टामा धन नाश हुनसक्छ । स्वास्थ्य प्रतिकूल रहने छ । अनावश्यक यात्राबाट जोगिनु राम्रो हो । राशीपति बृहस्पति कर्मक्षेत्रमा रहेको हुँदा केही आशावादी हुने ठाउँ पनि देखिन्छ । व्यापार वा नोकरीमा गरेको प्रयास सार्थक हुनेछ । व्यापारको विस्तार हुनेछ र पद बढ्ने छ । खास गरी यस महिनाको ०१, ०८, ०९, १०, १७, १८, १९, २७ र २८ गते तपाईंले बढी सचेतता अपनाउनु आवश्यक छ ।

मकर (भो, ज, जि, खि, खु, खे, खो, गा, गि) –
भाग्येश बुध सातौं भावमा रहेकाले महिनाको २१ गतेसम्म राम्रो परिणाम प्राप्त हुनेछ । प्रसिद्धि र सम्मानमा बृद्धि हुनेछ । विद्वानहरूका साथमा घुलमिल हुने मौका आउने छ । बन्दव्यापारमा बढावा हुनेछ । विपरीत लिङ्गीहरूबाट सहायता मिल्नेछ । सुखद यात्रा हुने सङ्केत पनि छ । किनमेलका क्षेत्रबाट लाभ प्राप्त हुनेछ । साझेदार र सहयोगीले पूर्णरूपेण सहयोग गर्नेछन् । कुनै प्रतिस्पर्धामा समेत सफलता हाासिल हुनेछ । तर सूर्य र मङ्गल ग्रह पनि सातौं भावमा नै रहेको तथा राशिस्वामी शनि बक्री हुनाले मानसिक रूपले तनावग्रस्त र अस्वस्थ हुने सम्भावना पनि छ । कडा मिहिनेत गर्दा पनि राम्रो परिणाम हात पार्न सकिने छैन । व्यवसायिक÷व्यापारिक क्षेत्रमा रहेका नजिकका साथीभाइ र कामदारले धोका दिनसक्छन् । घरपरिवारभित्रका वादविवाद, झैझगडा र समस्याहरूमा संयमता अपनाउनु राम्रो हुनेछ । यस महिनाको ०२, ०३, १०, ११, १२, १९, २०, २१, २९, ३० र ३१ गते तपाईंका लागि अशुभ रहने छन् ।

कुम्भ (गु, गे, गो, सा, सि, सु, से, सो, द) –
यो समय उपयोगी छ, जे गरे पनि सफलता हात पर्ने सम्भावना हुन्छ । पहिले देखिएका प्रायशः समस्याहरूको निराकरण हुनसक्छ । प्रतिस्पर्धीहरूमाथि विजय प्राप्त हुनेछ । पछाडि उछित्तो काड्ने र कुरा काट्नेहरू आफैं चुप लाग्नेछन् । नोकरी र व्यायसायिक जीवनमा सुधार आउने छ । प्रतिष्ठा र पदोन्नतिको सम्भावना छ । आफ्नो सर्कलमा सम्मान र साख मिल्नेछ । षष्ठम भावमा रहेका सूर्य, मङ्गल र बुधको प्रभावले धनसम्पत्तिको लाभ हुने सम्भावना छ । पारिवारिक वातावरण पनि सुखद हुनेछ । भाग्येश शुक्र केन्द्रवर्ती रहेकाले बडो आनन्द र उमङ्गका साथमा समय बित्नेछ । तर राशिस्वामी बक्री भएकाले क्रोध, अहंभाव र उन्मादमा नियन्त्रण गर्नु राम्रो हुन्छ । पेसा वा व्यवसायसँग सम्बद्ध परिवर्तन गर्न खोज्नु हानिकारक हुन्छ । जग्गाजमिनको किनबेच गर्ने प्रक्रियालाई स्थगित राख्नु बेस हुनेछ । सामान्यतया यस महिनाको ०४, ०५, १२, १३, १४, २२, २३, २४, ३१ र ३२ गते तपाईंका लागि अशुभ रहने छन् ।

मीन (दि, दु, थ, झ, ञ, दे, दो, च, चि) –
मनमा ठूलो उत्साह र उमङ्गको सिर्जना हुनेछ । यद्यपि प्रेमप्रसङ्ग, प्रणय एवं रतिरागका क्षेत्रमा निर्लिप्त हुन यो समय उपयोगी हुँदैन । पढाइलेखाइ र बौद्धिक क्रियाकलापका लागि उचित समय छ, तर चिन्तनमननमा बढी निर्लिप्त हुनु पनि हानिकारक बन्नसक्छ । आकस्मिक यात्राको अवसर आउन सक्छ । भाग्येश मङ्गल पाँचौं घरमा रहेको हुँदा छोराछोरीका तर्फबाट सन्तुष्टि प्राप्त हुनेछ । नयाँनयाँ उद्यम र योजना कार्यान्वयन गर्नाले सफलता मिल्नेछ । यो समय प्रणय र रोमान्सका लागि पनि राम्रै छ । सृजनशीलताको प्रशंसा र सराहना हुनेछ । एउटा स्मरणीय यात्रा हुने सङ्केत पनि छ । राशिस्वामी बृहस्पति सातौं भावमा रहेकाले दाम्पत्य जीवनको भरपूर सुख भोग गर्न पाइने छ । मन निडर रहने छ र शत्रुगणले सामु पर्ने हिम्मत गर्दैनन् । विद्वानसित सम्पर्क बढ्ने छ । सामान्यतया यस महिनाको ०६, ०७, १५, १६, १७, २४, २५ र २६ गते तपाईंका लागि अशुभ रहने छन् ।

 

photo

NOC1-250x300