के कुनै आमाले आफ्नै सन्तानलाई जिउँदै खाल्डोमा हालेर माटोले पुर्न सक्छ ? सामान्यतया कुनै आमा यति कठोर हुन सक्दैनन् । तर, कुनै आमाले भने क्रुरताको सबै सीमा नाघिदिन्छन् । यस्तै मुटु हल्लाउने घटना भारतको गुजरातको सुरेन्द्रनगर जिल्लामा भएको छ । यहाँ एक आमाले आफ्नी नवजात छोरीलाई जन्मेको २ घण्टामै खाल्डोमा फालिदिएकी छिन् ।
करिब ५ घण्टासम्म ती नवजात भिसोमा नाङगै खाल्डोमा फालिइन् । चिसोमा कठ्याङ्ग्रिंदै बसिन् । उनलाई कमिलाले खाइरहे । भनिन्छ नि मार्ने भन्दा बचाउने ठूलो हुन्छ । ती बालिकाको हकमा पनि त्यस्तै भयो । आमाले खाल्डोमा फालेपछि नवजातलाई जिउँदै माटोले पुर्न चाहेकी थिइन् । तर, उनले माटो हाल्न लाग्दा नजिकै केही मान्छेहरु हिँडिरहेको थाहा पाएपछि बालिकालाई त्यत्तिकै छोडेर भागिन् । त्यतिबेला हिँडेका मानिसले पनि त्यहाँ बालिका भएको थाहा पाएनन् तर ५ घण्टापछि अर्कै एक व्यक्तिले त्यहाँ बालिका भएको थाहा पाए ।
बालिका त्यहाँ भएको थाहा पाएपछि उनले बालिकालाई त्यहाँबाट निकाले । बालिका झण्डै ५ घण्टा चिसोमा फालिएकी थिइन् र उनलाई कमिलाले खाएका थिए तर भाग्यवश उनी जीवितै थिइन् । फेला पारेका स्थानीयले बालिकालाई अस्पताल लिएर गए र पुलिसलाई खबर गरे । पुलिसले जाँच गर्दा बालिकाकी आमाको बारेमा थाहा भयो । जब पुलिस महिलाको घर पुग्यो उनी घरमा आरामले सुतिरहेकी थिइन् । महिलाका अनुसार उनले बिहान ४ बजे छोरी जन्माएपछि उनलाई खाल्डोमा फालेकी थिइन् । महिलाका २ छोरी पहिल्यै छन् । तेस्रो पटक पनि छोरी भएका कारण उनले छोरीलाई खाल्डोमा जिउँदै पुर्न चाहेको बताइन् । हेर्नुहोस् भिडियो :-
