देव गुरुङलाई पराजित गर्दै लमजुङबाट पृथ्वीसुब्बा गुरुङ निर्वाचित

४ मंसिर,काठमाडौं । नेकपा (माओवादी केन्द्र) का महासचिव देव गुरुङलाई पराजित गर्दै लमजुङबाट नेकपा (एमाले) का उपमहासचिव पृथ्वीसुब्बा गुरुङ प्रतिनिधिसभा सदस्य निर्वाचित भएका छन् ।

उनले आफ्ना निकटतम प्रतिस्पर्र्धी नेकपा (माओवादी केन्द्र)का महासचिव देवप्रसाद गुरुङलाई ३ हजार १८८ मत अन्तरले पराजित गर्दै प्रतिनिधिसभा सदस्य विजयी भएका हुन्।

निर्वाचित गुरुङले ३४ हजार ९६९ र निकटतम प्रतिस्पर्धी गुरुङले ३१ हजार ७८१ मत प्राप्त गरेका छन् । लमजुङमा कूल १ लाख ३३ हजार ५५९ मतदातामध्ये ८० हजार १९२ मत खसेको थियो।

खसेको मतमध्ये प्रतिनिधिसभातर्फ २ हजार ३८४ मत बदर भएको छ । त्यस्तै,राष्ट्रिय स्वतन्त्र पार्टीका धर्मराज केसीले ९ हजार २९ मत प्राप्त गरेर तेस्रो भएका छन्।

त्यस्तै,पराजित माओवादी महासचिव देव गुरुङले एमाले उपमहासचिव पृथ्वीसुब्बा गुरुङलाई बधाई दिएका छन् । पृथ्वीसुब्बा गुरुङ बसेकै होटलमा पुगेर देव गुरुङले बधाई तथा शुभकामना व्यक्त गरेका थिए ।