निर्वाचन आयोगद्वारा तीन वटा निर्वाचन चिन्हहरु हेरफेर

२९ असोज,काठमाडौं । प्रतिनिधिसभा र प्रदेशसभा सदस्य निर्वाचनको लागि निर्धारित चिन्हमध्ये तीन वटा निर्वाचन चिन्हहरुमा निर्वाचन आयोगले सामान्य हेरफेर गरेको छ ।

आयोगले असोज २७ गतेको निर्णयअनुसार प्रतिनिधिसभा सदस्य तथा प्रदेशसभा सदस्य निर्वाचन निर्देशिका,२०७९ को दफा ८७ ले दिएको अधिकार प्रयोग गरि ती निर्वाचन चिन्हको अनुसुचीमा हेरफेर गरेको हो ।

निर्वाचन आयोगको अभिलेखमा रहेकोे निर्वाचन चिन्हको नाम र चिन्हमा केही भिन्नता देखिएको र आयोगमा रहेको अभिलेख र निर्देशिकामा रहेको विवरणबीच भिन्नता पाइएकोले उक्त निर्णय गरिएको उपसचिव एवं आयोगका सहायक प्रवक्ता कमल भट्टराईले एक बिज्ञप्ति मार्फत जानकारी दिएका छन ।

प्रतिनिधिसभा सदस्य निर्वाचन तथा प्रदेशसभा सदस्य निर्वाचन निर्देशिका,२०७९ को अनुसूची २९ को क्रम संख्या १३ मा रहेको हाम्रो नेपाली पार्टीको निर्वाचन चिन्ह लौरो र अनुसूची-३० को खण्ड (क) मा रहेको स्वतन्त्र उम्मेदवारको लागि निर्धारित निर्वाचन चिन्ह अन्तर्गत डोजर र क्रस खुकुरी निर्वाचन चिन्हमा हेरफेर गरिएको हो ।

हेरफेर गरिएका निर्वाचन चिन्हसहितको विवरण आयोगको वेभ साईटमा राखिएको निर्वाचन आयोगले जनाएको छ ।