सूर्यविनायक गणेशको जन्मोत्सवका अवसरमा खटजात्रा सम्पन्न

१६ भदौ भक्तपुर।
काठमाडौं उपत्यकाको चार विनायक मध्येको एक विनायक सुर्यविनायक गणेशको जन्मोत्सवका अवसरमा खटजात्रा सम्पन्न भएको छ।गत १५गते गणेश चतुर्थीको दिन जात्रा सम्पन्न भएको हो।

सुर्यविनायक क्षेत्र प्रवन्ध समितिको विशेष आयोजना र सुर्यविनायक युवा क्लब,सुर्यविनायक नगरपालिका वडा नं.८ र ६,स्थानीय भजन समितिहरु तथा गुठियारहरुको बिशेश सहयोगमा जात्रा सम्पन्न भएको थियो।

विविध कारणले बन्द रहेको यो जात्रा करिव ५० बर्शपछी गतवर्ष बाट संचालनमा आएको थियो।सुर्यविनायक नगरपालिकाको वडा नं.८ र ६ को बिशेश पहलमा सुर्यविनायक क्षेत्र प्रवन्ध समितीनै गठन गरेर यहाँको धार्मिक,सांस्कृतिक, ऐतिहासिक धरोहर र परम्पराको संरक्षण गर्ने अभियान शुरु भएको सुर्यविनायक क्षेत्र प्रवन्ध समितीका अध्यक्ष एवं वडा नं.८ का अध्यक्ष पुष्पराज बस्नेतले जानकारी दिनुभएको छ।

सूर्यविनायकको मूल मूर्तिलाई खटमा राखी एकापसमा सिन्दुर दलेर वडा नं ८ र ६ को विभिन्न टोलको परिक्रमा गरेर जात्रा सम्पन्न भएको थियो।
गणेश चतुर्थीका दिन परापूर्वकालदेखि मनाउँदै आएको सूर्यविनायक गणेश (इनरे गणेद्यो) को लोपोन्मुख जात्रालाई बर्सेनि निरन्तरता दिइने सूर्यविनायक युवा क्लबका अध्यक्ष मनोज गिरीले बताउनुभएको छ।
काठमाडौं उपत्यकाको चार विनायक मध्ये सुर्यविनायकको आफ्नै सांस्कृतिक र ऐतिहासिक महत्व रहेको छ।स्थानीयहरुले गणेद्यो भनेर संवोधन गर्ने गरेका छन।सुर्यविनायक गणेशको मूर्तिलाई वर्षको दुईपटक मात्रै सार्वजनिक गरेर पुजा गर्ने किम्बदन्ती रहेको छ।

गणेश चतुर्थीका दिन जात्राका लागि सार्वजनिक गरिने मूर्तिलाई बिस्केट जात्राको अवसरमा वैशाख ३ गते भक्तपुर नगरको तालक्वःमा लैजान र त्यहाँ वैशाख ४ गते हुने सगुन जात्राका क्रममा पूजा थाप्न सार्वजनिक गर्ने परम्परा रहेको जात्रा व्यवस्थापन समितीका संयोजक बिष्णु राजथलाले जानकारी दिनुभएको छ ।कार्यक्रममा सुर्यविनायक नगरपालिकाका मेयर बासुदेव थापाको पनि विशेष उपस्थिति रहेको थियो।