मंसिर २४, काठमाडौँ । प्रहरी महानिरीक्षक सर्वेन्द्र खनालले बलात्कारपछि हत्या गरिएकी कञ्चनपुर भीमदत्तनगरकी १३ वर्षीया बालिका निर्मला पन्तको अनुसन्धानको परिणाम छिट्टै आउने बताएका छन् ।
संसदको दीगो विकास तथा सुशासन समितिमा उपस्थित भएका महानिरिक्षक खनालले निर्मला बलात्कार तथा हत्या प्रकरणमा दोषीको खोजी गरिरहेको भन्दै यसको परिणाम छिट्टै आउने बताएका हुन् ।
निर्मला पन्तको बलात्कार र हत्याको घटनामा प्रहरी अपराधि नजिक पुगेको दाबी गर्दै खनालले भने, ‘घटनाको अनुसन्धान साँघुरिएको छ । छिट्टै परिणाम अाउँछ’ ।
निर्मला पन्तको बलात्कार र हत्यामा संलग्न भएको आरोपमा प्रहरीको केन्द्रीय अनुसन्धान ब्युरो सिआइबीको टोलीले कञ्चनपुरकै १७ वर्षीय प्रदीप रावल र विशाल चौधरीलाई नियन्त्रणमा लिएर अनुसन्धान सुरु गरिसकेको छ ।
निर्मलाको हत्यामा संलग्न भएको आशंकामा पक्राउ परेका उनीहरुको डिएनए परिक्षणका लागि पठाइएको छ । रिपोर्ट भने आउन बाँकी छ ।
यता हत्यामा संलग्न भएका भनिएका ती दुई युवक रावल र चौधरी निर्मलाको हत्या भएको दिन (साउन १०–११) मा प्रहरी हिरासतमै भएको बताइएको थियो ।
निर्मला पन्तको बलात्कार तथा हत्या प्रकरणमा नेपाल प्रहरीको अनुसन्धान सुरुदेखि नै विवादमा पर्दै आइरहेको समयमा अहिले पक्राउ परेका युवकहरु साँच्चिकै अपराधी हुन् या होइनन् भन्ने सर्वसाधारणमा आशंका बढेको छ ।
साउन १० गते साथीको घरमा गृहकार्य गर्न जान्छु भनेर गएकी १३ वर्षीय बालिका निर्मला पन्तको दोस्रो दिन साउन ११ गते बलात्कारपछि हत्या भएको अवस्थामा उखुबारीमा शव भेटिएको थियो ।
