प्रधानमन्त्री ओलीलाई प्रदीप पौडेलको प्रश्न– जनतालाई त्यसरी ढाँटेर मत लिन पाइन्छ ?

प्रमुख प्रतिपक्षी दल नेपाली कांग्रेसका युवा नेता प्रदीप पौडेलले प्रधानमन्त्री केपी शर्मा ओलीको नियत राम्रो नभएको बताएका छन् । कांग्रेसको भ्रातृ संगठन नेविसंघले सोमबार काठमाडौंको बत्तिसपुतलीमा आयोजना गरेको ‘वर्तमान अवस्थामा नेविसंघको भूमिका’ विषयक बिचार गोष्ठिमा युवा नेता पौडेलले प्रधानमन्त्री ओलीले निरंकुश शासक बन्न खोजेको आरोप लगाए ।

राजश्व अनुसन्धान विभाग, राष्ट्रिय अनुसन्धान विभाग, सम्पत्ति शुद्धीकरणलाई आफ्नो मातहतमा राख्नुका साथै कूल बजेटको ११ प्रतिशत रकम लिन खोजेर प्रधानमन्त्री ओलीले आफूलाई बलियो बनाउन खोजेको उनको दावी थियो । 
‘‘११ प्रतिशत रकम लिएर के गर्न खोजेको ? विभागहरु, सरकारी वकिलहरु उहाँसँग छ । प्रधानमन्त्रीको नियत राम्रो छैन,’’ कांग्रेस नेता पौडेलले भने, ‘‘संस्था राम्रो, संविधान बलियो होइन, उहाँ आफू बलियो हुन खोज्नु भएको छ ।’’ लोकतन्त्रमा व्यक्ति बलियो भए खतरनाक हुने भन्दै उनले लोकतान्त्रिक व्यवस्थामा ओलीले बलियो शासक बन्न खोजेको जिकिर गरे ।  
कम्युनिष्टहरुका सामुन्ने अब दुई वटा विकल्पमात्रै रहेको जिकिर गर्दै युवा नेता पौडेलले भने, ‘‘कम्युनिज्म, साम्यवाद, लेनिनवाद र माओवादप्रति इमान्दारिता देखाउने र संविधानप्रति बेइमानी गर्ने अथवा कम्युनिज्म, साम्यवाद, लेनिनवाद र माओवादप्रति बेइमानी गरेर र संविधानप्रति इमान्दारिता देखाउने ।’’ उनले नेपालका कम्युनिष्टहरुले संविधानप्रति बेइमानी गरेर लेनिनवाद र माओवादप्रति इमान्दारिता देखाउने खतरा बढ्दै गएको पनि बताए ।
प्रधानमन्त्री ओलीले प्रतिनिधिसभा र प्रदेशसभा निर्वाचनमा जनतालाई ढाँटेर मत लिएको उनले टिप्पणी गरे । चुनाव अगाडि आफू प्रधानमन्त्री भए वृद्धभत्ता बढाउने झुटो आश्वासनले जनता ढाँटेर ओलीले मत लिएको उनको भनाइ थियो । 
‘‘उहाँले चुनावका बेला अब एमालेको सरकार बन्छ, म प्रधानमन्त्री बन्छु । वृद्धभत्ता दुई हजारबाट बढेर पाँच हजार पुग्छ भन्नुभयो । तर उहाँ प्रधानमन्त्री भएर आएको बजेटमा वृद्धभत्ता दुई हजारबाट एक रुपैयाँ पनि बढेन,’’ युवा नेता पौडेलले प्रश्न गरे, ‘‘जनतालाई त्यसरी ढाँटेर मत लिन पाइन्छ ? घोषणापत्रमा एउटा लेख्ने, अनि बजेटमा घोषणापत्रलाई कहीँ कतै छेउ टुप्पोलाई नछोइ बजेट प्रस्तुत गर्न पाउँछ ? लोकतन्त्रमा जनतालाई ढाँटेर नेता बन्ने यो कस्तो विधिको शासन हो ?’’ 
उनले संसदमा कांग्रेसले बलियो प्रतिपक्षको भूमिका निभाउन नसकेकोप्रति आपत्ति जनाए । कांग्रेसका नेताहरुमा अझै पनि आफूहरु सत्तामा बसेको भ्रम रहेको टिप्पणी गर्दै पौडेलले फेरिएको परिस्थितिमा कांग्रेसले भूमिका फेर्न जरुरी रहेको जिकिर गरे । 
‘‘लामो समयसम्म सत्तामा बसेको बानी परेका हाम्रा नेताहरुलाई आज पनि सत्तामा बसेझै लागेको छ,’’ उनले भने, ‘‘परिस्थिति फेरिएको छ । हिजो सत्ताको न्यानोमा बसेजस्तो आज छैन । प्रतिपक्षमा पुगेको कांग्रेसको भूमिका फेरिन जरुरी छ ।’’ हिजोकै भूमिकामा कांग्रेसलाई उचाइमा पुर्याउन नसकिने स्पष्ट पार्दै पौडेलले कांग्रेस बलियो बन्नका लागि नयाँ भूमिका र नयाँ परिवेश आवश्यक रहेको बताए । 
कांग्रेसलाई जनताले तिरस्कार गरेको नभएर सच्चिने मौका दिएको भन्दै उनले कांग्रेसले आगामी ५ वर्षभित्र आफूलाई सच्याएर अगाडि बढे अर्को निर्वाचनमा सवै कम्युनिष्ट एक भए पनि कांग्रेसलाई पराजित गर्न नसक्ने दावी गरे । पौडेलले भने, ‘‘तर यसका लागि कांग्रेस सच्चिन जरुरी छ । पार्टीको मुद्दा अगाडि लैजान जरुरी छ ।’’